Коммерстант թերթն անդրադարձել է այսօր Կազանում Ռուսաստանի Դաշնության նախագահ Դմիտրի Մեդվեդևի միջնորդությամբ Սերժ Սարգսյանի և Իլհամ Ալիևի միջև կայանալիք բանակցություններին։ Ըստ թերթի՝ այնտեղ ստորագրվելու է մի փաստաթուղթ, որը պարունակում է արդեն 20 տարի չլուծված ղարաբաղյան հակամարտության կարգավորման «ճանապարհային քարտեզ»: Սրա հիմքում ընկած են լինելու Մադրիդում 2007 թ. ԵԱՀԿ-ի կողմից ներկայացված կարգավորման սկզբունքները, որոնք նախկինում մերժվել էին Բաքվի և Երևանի կողմից: Թերթը նշում է, որ միայն փաստաթղթի ստորագրումը կարող է կանխել ռազմական գործողությունների վերսկսումը բուն Ղարաբաղում։
Ռուսաստանի արտգործնախարարությունում թերթի աղբյուրը նշել է, որ «հաջողությանն այսքան մոտ մենք դեռ երբեք չէինք եղել»՝ հիշեցնելով ՌԴ արտաքին գերատեսչության երեկ տարածած հայտարարությունը, թե հանդիպումը բեկումնային է լինելու Լեռնային Ղարաբաղի հակամարտության կարգավորման հարցում:
Նշվում է, որ փաստաթղթի բովանդակությունը գաղտնիք է պահվում, սակայն դիվանագետներից մեկը, որը մասնակցել է դրա մշակմանը, Коммерстант-ին ասել է, որ դրա մեջ Մադրիդյան սկզբունքներն են, որոնք նախատեսում են փուլային տարբերակ: Ստորագրումից հետո երեք համանախագահող երկրների միջնորդությամբ մշակվելու է խաղաղության պայմանագիրը: Աղբյուրը նշել է, որ այս հաջողությանը մեծապես նպաստել է այս տարվա մարտին Մեդվեդևի, Սարգսյանի և Ալիևի միջև տեղի ունեցած հանդիպումը:
Փաստաթղթով հայկական կողմը պետք է վերադարձնի Լեռնային Ղարաբաղի հարակից 6 շրջանները, ինչպես նաև Լաչինի 13 գյուղեր, պահպանվելու է կապը Հայաստանի և Լեռնային Ղարաբաղի միջև, իսկ անվտանգությունն ապահովելու են խաղաղապահ ուժերը: Ղարաբաղում մի քանի տարի հետո անցկացվելու հանրաքվե, որը կորոշի նրա կարգավիճակը, սակայն որպես պայման նշվում է փախստականների վերադարձը: Թերթը նաև գրում է, որ կողմերը հրաժարվելու են ուժի կիրառումից, ընդ որում՝ դա իրավաբանորեն ամրագրվելու է:
Коммерстант-ը հավելում է, որ սա նախագահ Մեդվեդևի մեծագույն ձեռքբերումներից կլինի, քանի որ հատկապես Վրաստանից հետո Արևմուտքը մեղադրում էր Ռուսաստանին սառեցված հակամարտությունների կարգավորմանը խոչընդոտելու մեջ: «Նախագահն ընկալում է ղարաբաղյան կարգավորումը որպես սեփական առաքելություն: Խաղաղությունը Անդրկովկասում համապատասխանում է Ռուսաստանի արմատական շահերին, այնպես որ, մենք շարունակելու ենք մեր միջնորդական գործունեությունն այնքան, որքան անհրաժեշտ է»,- նշել են Կրեմլում: Աղբյուրը նաև ասել է, որ հնարավոր են անակնկալներ, քանի որ վերջնական ձևակերպումները արվելու են Կազանում:
