Ի պաշտպանություն նոյեմբերի 5-ի իրադարձությունների հետևանքով ձերբակալված Շանթ Հարությունյանի բողոքի ակցիային և երթին այսօր մասնակցում էր «Ժառանգություն» կուսակցության առաջնորդ, ՀՀ նախագահի նախկին թեկնածու Րաֆֆի Հովհաննիսյանը:
Նա «Առաջին լրատվական»-ի հետ զրույցում ասաց, որ Շանթ Հարությունյանին համարում է քաղբանտարկյալ և պահանջում է ազատ արձակել նրան:
Անդրադառնալով նոյեմբերի 5-ի հայտնի իրադարձություններին՝ Ր. Հովհաննիսյանն ասաց. «Քաղաքացիական իր իրավունքն իրացրեց, ես գիտեմ, որ սադրիչներ կային՝ քննությունը ցույց կտա, բայց ակնհայտ է, որ Շանթ Հարությունյանը իրավատեր քաղաքացի է և պայքարում է հանուն ազատ, ինքնիշխան Հայաստանի»:
Մեր հարցին՝ արդյոք ընդդիմադիր ուժե՞րն են իրենց սպառել այնքան, որ անհատ քաղաքացիներն իշխանափոխության հասնելու համար այսպիսի ծայրահեղ քայլերի են դիմում, մեր զրուցակիցը պատասխանեց. «Ամեն մեկն ունի իր պատասխանատվությունը, ոչ միայն քաղաքական ուժերը, այլ նաև քաղաքացիական ուժերը՝ շատերը առանձին-առանձին ուզում են իրենց պայքարը տանել: Այս հարթակից իմ առաջարկը եղել է հետևյալը՝ որևէ մարդու անուն, այդ թվում՝ իմը, որևէ կուսակցության անուն չպետք է առանձնացվի, ժողովուրդն ինքը պետք է պայմաններ ստեղծի, որ ունենանք փոփոխություն, որը ոչ թե իշխանափոխություն է, այլ սահմանադրական, իրավական Հայաստանի ստեղծում»,- եզրափակեց «Ժառանգության» առաջնորդը:
