Մի խումբ քաղաքացիներ, հասարակական-քաղաքական գործիչներ այսօր անցկացրին բողոքի ակցիա և երթ՝ ի պաշտպանություն «Ցեղակրոն» կուսակցության առաջնորդ, նոյեմբերի 5-ի իրադարձությունների հետևանքով ձերբակալված Շանթ Հարությունյանի:
Քաղաքացիները պահանջում էին ազատ արձակել Շանթ Հարությունյանին և նրա ընկերներին, քանի որ նրանց ձերբակալությունն ակնհայտորեն քաղաքական դրդապատճառներ ունի. «Հայաստանն առանց քաղբանտարկյալների», «Անսերժ Հայաստան», «Սերժիկ, հեռացիր», «Ո՛չ Մաքսային միությանը», «Ո՛չ Պուտինին» և այլ կոչերով երթի մասնակիցները՝ ոստիկանության ուղեկցությամբ, շարժվեցին Երևանի փողոցներով, ակցիա անցկացրին Կառավարության և ՀՀ գլխավոր դատախազության շենքերի դիմաց:
Ի դեպ, նրանք նաև ոստիկաններին կոչ արեցին հանել իրենց համազգեստն ու միանալ երթին և իրենց հետ միասին հեղափոխություն անել, սակայն նման բան, իհարկե, տեղի չունեցավ:
Քաղաքացիական ակտիվիստ Վրեժ Զատիկյանը՝ ԱԻՄ առաջնորդ Պարույր Հայրիկյանի քրոջ որդին, ամբողջ երթի ընթացքում մարդկանց հորդորում էր դուրս գալ փողոց և պայքարել իրենց իրավունքների համար:
Երթի մասնակիցների շարքում էին նաև ընդդիմադիր «Ժառանգություն» կուսակցության նախագահ Րաֆֆի Հովհաննիսյանը, փոխնախագահ Արմեն Մարտիրոսյանը և կուսակցության մի շարք այլ անդամներ, ովքեր վստահաբար ընդգծում են, որ Շանթ Հարությունյանը քաղբանտարկյալ է:
Մանրամասները՝ տեսանյութում:
Լուսանկարը` PanARMENIAN Photo-ի
