Սիրիայի տարածքում գործող գրոհայինները երկու անգամ անհաջող կերպով փորձել են հարձակում գործել քիմիական նյութերի պահեստների վրա, որոնք օգտագործվում են թունավոր գազ ստեղծելու համար: Այս մասին հաղորդում է լիբանանյան Daily Star-ը` վկայակոչելով անանուն արևմտյան դիվանագետին:
Նրա խոսքերով՝ այս մասին հաղորդել է Քիմիական զենքի արգելման կազմակերպության Սիրիայի ներկայացուցիչը գործադիր խորհրդի փակ նիստին: Նա նաև նշել է, որ հարձակումները հետ են մղվել: Թե երբ են ձեռնարկվել հարձակումները՝ չի հաղորդվում:
Ակնկալվում է, որ Սիրիայի քիմիական զենքը կոչնչացվի մինչև 2014թ. ամառ՝ ամերիկյան հատուկ նավի վրա: Հիշեցնենք, որ քիմիական զենքի առաջին խմբաքանակն արդեն բեռնվել է դանիական նավի վրա, որը դուրս է եկել սիրիական Լաթաքիա նավահանգստից:
