Ադրբեջանական APA լրատվական գործակալության փոխանցմամբ՝ ռազմա-քաղաքական հարցերով ԱՄՆ փոխպետքարտուղար Էնդրյու Շապիրոն ժամանել է Ադրբեջան։
Շապիրոն գլխավորում է ամերիկյան պատվիրակությանը, որը վաղը Բաքվում մասնակցելու է անվտանգության հարցերով ԱՄՆ-Ադրբեջան երկխոսության հերթական փուլին։
Այդ երկխոսությունը մասնավորապես նվիրված է լինելու միջազգային և ծովային անվտանգությանը, ահաբեկչության դեմ պայքարին, սահմանների անվտանգությանը, միջուկային զենքի չտարածման ոլորտում երկկողմանի համագործակցությանը։
Շապիրոն հանդիպումներ կունենա մի շարք քաղաքացիական բարձրաստիճան պաշտոնյաների ու ռազմական սպաների հետ, որոնց ընթացքում կքննարկի ընդհանուր անվտանգության խնդիրների լուծմանն ուղղված դիվանագիտական նախաձեռնությունները։
