Ֆրանսիական մի քանի քաղաք միանգամից որոշել են արգելել հայտնի սկանդալային կատակերգու Դյեդոն Մբալա Մբալայի ներկայացումները, որին բազմիցս մեղադրել են հակասեմիթականության համար:
Ֆրանսիայի ներքին գործերի նախարարությունը տարածել է կարգադրությունը՝ կատակերգուի ներկայացումն արգելելու վերաբերյալ, հայտնում է Euronews-ը:
Դերասանը հայտնի դարձավ շնորհիվ «Աստերիքսն ու Օբելիքսը» ֆիլմի, ապա սկսեց հանդես գալ միայնակ:
Նա կատակերգություն էր բեմադրել հրեաների մասին, ինչը բուռն վրդովմունք էր հարուցել, իսկ 2008թ. շոուում Հոլոքոստն անվանել էր «հուշարձանային պոռնոգրաֆիա»:
Հրեական կազմակերպությունները կոչ էին արել բոյկոտել արտիստի ելույթը: Գործին միջամտել էր անգամ Ֆրանսիայի նախագահ Ֆրանսուա Օլանդը, որը հայտարարել էր, որ «ոչ ոք չպետք է ներկայացումներն օգտագործի որպես սադրանք»:
Արտիստի ներկայացուցիչներն արդեն արգելող միջոցառումներն անվանել են «հարձակում խոսքի ազատության վրա» ու «գրաքննության ակտ»:
