ԱՄՆ–ն, Մեծ Բրիտանիան և Ֆրանսիան Բաշար Ասադի ռեժիմի նկատմամբ շատ ավելի կոշտ միջոցներ են կիրառելու, քան մինչ այդ, եթե Դամասկոսը կրկին հանդգնի քիմիական զենք օգտագործել,– հայտարարել է ԱՄՆ նախագահ Դոնալդ Թրամփի ազգային անվտանգության հարցերով խորհրդական Ջոն Բոլթոնը,– հաղորդում է Ազատություն Ռադիոկայանը։
Վաշինգտոնի, Լոնդոնի և Փարիզի համատեղ հայտարարության մեջ ասվում է, որ Իդլիբում սիրիական կառավարական զորքերի կողմից քիմիական զենքի նոր կիրառումն արագ և կոշտ արձագանքի է արժանանալու կոալիցիայի երկրների կողմից, շատ ավելի խիստ, քան նախկին օդային և հրթիռային հարվածներն էին։
Բոլթոնի խոսքերով՝ երեք կողմերը այս հարցի շուրջ խորհրդակցություններ են անց կացնում և կիսում են ընդհանուր դիրքորոշումը։
Հիշեցնենք, որ ԱՄՆ–ն հայտարարել էր, թե ապացույցներ ունի՝ Ասադի զորքերի կողմից Իդլիբի նկատմամբ նոր քիմիական գրոհի նախապատրաստման մասին։
Սեպտեմբերի 10–ին ամերիկյան հետախուզությունը հայտարարել էր, որ տեղեկություններ ունի այն մասին, որ Բաշար Ասադը իր զորքերին թույլատրել է Իդլիբում ապստամբների նկատմամբ քլոր օգտագործել։
