Թուրքիայում կաշառակերության դեմ անցկացված գործողությունը, որն առնչվում է նաև նախարարների կաբինետի որոշ անդամների, «սադրանք է, որի նպատակը կառավարության տապալումն է»: Այս մասին Թուրքիայի վարչապետ Թայիփ Էրդողանը հայտարարել է ճապոնական NHK հեռուստաալիքին տված հարցազրույցում՝ Ճապոնիա պաշտոնական այցից առաջ:
«Նման գործողությունները մեր երկիրը սխալ ուղղությամբ են տանում»,- նշել է Էրդողանը՝ մեկնաբանելով այն սկանդալը, որը կապված է փողերի լվացման, կաշառակերության և ոսկու մաքսանենգության կասկածանքով 50-ից ավել բարձրաստիճան պաշտոնյաների ձերբակալության հետ:
Միաժամանակ, Թուրքիայի վարչապետը վստահություն է հայտնել, որ կկարողանա երկրում իրադրությունը վերահսկողության տակ պահել: «Քաոսը երկար չի շարունակվի»,- հայտարարել է Էրդողանը:
NHK-ին տված հարցազրույցում Էրդողանը իր անհանգստությունն է հայտնել նաև Մերձավոր Արևելքում, մասնավորապես՝ Եգիպտոսում դեպքերի զարգացման կապակցությամբ:
«Մերձավոր Արևելքում ուժով հակամարտություններ լուծելն անթույլատրելի է: Հարկավոր է գիտակցել, որ ժողովրդավարությունը հնարավոր է միայն ժողովրդի կամքը հարգելու դեպքում»,- բացատրել է Թուրքիայի վարչապետը:
