Այսօր Հանրապետության հրապարակում հրավիրված մեծ հանրահավաքը իր մարդաշատությամբ, թերևս, հիշեցնում էր հեղափոխության օրերի հանրահավաքները: Իշխանության համար այնքան էլ սովորական չէ հանրահավաք անցկացնելը, սակայն Հայաստանում օբյեկտիվորեն գործում է հեղափոխության տրամաբանությունը, որը չեղարկում է դասական քաղաքակնության շատ կանոններ: Ի վերջո հանրային, զանգվածային ճնշման արդյունքում Հայաստանի վարչապետի պաշտոնը զբաղեցրել է ընդամենը 9 մանդատ ունեցող խմբակցության ներկայացուցիչը:
100 օրն ինքնին խորհրդանշական, պայմանական մի սահմանագիծ է՝ հեղափոխության համար առավել ևս: Մի կողմից՝ հեղափոխությունը ենթադրում է արագ տեմպ ու գործողություններ, և այս իմաստով 100 օրը լեցուն էր բովանդակությամբ, մյուս կողմից՝ 100 օրը կորցնում է իր սահմանագծային նշանակությունը, քանի դեռ երկրում վերջնականապես չի հաղթել հեղափոխությունը, այլ խոսքով՝ չեն ֆորմալիզացվել դրա արդյունքները: Այս իմաստով Նիկոլ Փաշինյանի 100 օրը իրականում կավարտվի խորհրդարանական արտահերթ ընտրություններով, որոնք կդնեն նոր իշխանության քաղաքական ինստիտուցիոնալ հիմքերը:
Թեմայի շուրջ «Առաջին լրատվական»- ի հետ քննարկմանը մասնակցեցին ազատամարտիկ, նախկին զինվորական Վահան Բադասյանը, իրավապաշտպան Արթուր Սաքունցը և աստվածաբան Վարդան Խաչատրյանը:
«Հանրահավաքում Նիկոլ Փաշինյանը կարևոր ուղերձներ հղեց առաջին հերթին ներքին քաղաքականության հետ կապված՝ կոռուպցիայի դեմ պայքարի, արտահերթ խորհրդարանական ընտրությունների վերաբերյալ, և նոր խնդիր առաջադրվեց՝ սահմանադրական փոփոխություններ իրականացնել,- նշեց Արթուր Սաքունցը:- Նիկոլ Փաշինյանը հստակ ամրագրեց, որ այսուհետ մեծ տեղ պետք է տրվի ժողովրդավարական մեխանիզմին՝ հանրաքվեին: Կարևորում եմ անցումային արդարադատության ամրագրումը, որն արդեն քաղաքական որոշում է»:
Իրավապաշտպանը նաև կարևորեց արտաքին քաղաքական ուղերձները՝ կապված հայ-ռուսական հարաբերությունների հետ, «որը փորձում էին շահարկել ռևանշիստական ուժերը, բայց ըստ էության հանրահավաքի ծավալը, ոգևորությունը և տրամադրությունը տեղ չթողեց այդպիսի հասկացության մասին: Մի կարևոր բան ևս՝ վարչապետը հայտարարեց, որ Մարտի 1-ի հանցագործությունը, ըստ էության, բացահայտված է, երևի թե նկատի ուներ, որ մեխանիզմն է ամբողջությամբ բացահայտված: Արցախին և Սփյուռքին ուղղված ևս կարևոր ուղերձներ հնչեցին»:
«Փաշինյանը հայտարարեց հեղափոխության երկրորդ փուլի մասին,- նկատեց Վ. Խաչատրյանը: – Ինձ համար ամենակարևորն այն էր, որ վարչապետը հայտարարեց, որ իշխանության գերագույն մարմինը ժողովուրդն է: Դա հեղափոխության կարևորագույն գրավականն է: Նաև շատ կարևոր եմ համարում այն հանգամանքը, որ նշվեց՝ հայ ժողովուրդը միասնականությամբ կարող է հաղթահարել այն ամենը, ինչը դիմադարձ կանգնած է»: Համաժողովրդական վստահության այսպիսի ցուցադրությունը, ըստ Վահան Բադասյանի, ուներ ներքին և արտաքին հասցեատերեր: Նրա խոսքով՝ թե՛ ռևանշիստները, և թե՛ դեսպանատների միջոցով դրսում բոլորը տեսան, որ ժնողովուրդը վստահում է նոր կառավարությանը: Նա նաև ընդգծեց, որ Փաշինյանը կրկին վստահության քվե վերցրեց՝ արդեն դատական համակարգում գործելու համար:
Մանրամասն՝ տեսանյութում:
