«Քաղաքապետի պաշտոնը վերջին տարիներին քաղաքականացվել է, ինչը բավականին մեծ վնաս է հասցրել Երևանին. Երևանը կորցնում է իր դեմքը, փոխվում են օդի և մթնոլորտային ցուցանիշները, կորցնում ենք պատմամշակութային հուշարձանները. Մենք բազմաթիվ խնդիրներ ունենք:
ժամանակն է, որ հանրությունը զբաղվի Երևանով և ինքը որոշի,թե ինչպես պետք է զարգանա մայրաքաղաքը»,- այս մասին «Առաջին լրատվական»- ի հետ զրույցում ասաց ճարտարապետ, Երևանի քաղաքապետի թեկնածու Անահիտ Թարխանյանը՝ հավելելով, որ քաղաքաները հրաշալի են, երբ մարդիկ ժպտում են:
«Մենք կորցրել ենք այն ամենն, ինչ ունեցել է Երևանը,- նկատեց մեր զրուցակիցը:- Երևանը պետք է վերափոխվի: Միջազգային հանրությունը վերջին տարիներին սահմանել է քաղաքների զարգացման համար մի քանի կարևոր ուղղություններ: Հնարավոր է այդ ուղղություններով զարգացնել նաև Երևանը: Հանրության կամքը և հետևողական լինելը կարող է քաղաքը դարձնել շատ ավելի հարմարավետ բնակչության համար: Երևանը պիտի լինի երևանցիների համար ընդունելի»:
Քաղաքական գործիչ Անդրիաս Ղուկասյանի կինը քաղաքական խարդավանքների ու խաղերի ականատեսը լինելով՝ ունեցել է բազմաթիվ դժվարություններ: Նրա խոսքով՝ երկու տարի շարունակ մեծ կամք, ուժ, հավատ և համբերատարություն էր պետք, որպեսզի հնարավոր լիներ ամեն օր արթնանալ ժպտալով և հավատալով, որ ամեն ինչ լավ կլինի:
«Պայքարը շատ բան է սովորեցնում. հանգստությունը, համբերատարությունը, հավասարակշռվածությունը և համոզվածությունը, որ ամեն ինչ լավ կվերջանա, օգնել է ինձ և շատ բան փոխել իմ մեջ»:
Անահիտ Թարխանյանը հավաստիացրեց, որ քաղաքապետի պաշտոնում չընտրվելու դեպքում չի ավարտվի իրենց ներդրումը Երևանի զարգացման համար:
Մանրամասն՝ տեսանյութում: