«Կոուպցիայի դեմ պայքարը հետհեղափոխական Հայաստանում պետք է տեղի ունենա ոչ թե իներցիայով, այլ համակարգային: Մեր նորօրյա Հայաստանում կոռուպցիայի դեմ պայքարը արագ պետք է տեղափոխել համակարգային հուն, որպեսզի արդյունքներն ավելի տեսանելի լինեն հանրության համար»,- «Առաջին լրատվական»- ի հետ զրույցում այս մասին ասաց Իրավաբանների հայկական ասոցիացիայի նախագահ Կարեն Զադոյանը:
Ապօրինի հարստացման քրեականացման մասին օրենքը կյանքի կոչելու համար պահանջվել է 10 տարի, այն ընդունվել է նախորդ տարի:
Զադոյանի խոսքով՝ Քաղաքացիական հասարակական կազմակերպությունների հակակոռուպցիոն կոալիցիան հեղափոխությունից անմիջապես հետո կառավարությանը և ԱԺ-ին առաջարկել է, թե ինչ կարևորագույն քայլեր պետք է անել. «Առաջին քայլերից է ակտիվների վերականգնումը. դա միջազգային հակակոռուպցիոն մեխանիզմ է, որը հնարավորություն է տալիս ապօրինի ձեռք բերված և երկրի տարածքից դուրս գտնվող ակտիվները վերադարձնել, նման նախադեպեր կան, տարբեր երկրներում այդ մեխանիզմը կիրառվում է: Մենք ունենք փորձագիտական այն ներուժը, որ կարող ենք այս մեխանիզմը կյանքի կոչել, եթե ունենանք կառավարության աջակցությունը:
Մյուս կարևորագույն խնդիրն այն է, որ մեր տիպի փոքր երկրներում պետք է կոռուպցիայի դեմ պայքարը կենտրոնացված իրականացվի, մեզ մոտ դա ապակենտրոնացված է իրականացվում:
Պետք է ստեղծվի հակակոռուպցոին ինստիտուցիոնալ մարմին, որը պետք է ունենա 3 հիմնական գործառույթ՝ հակակոռուպցիոն կրթություն, կանխարգելում և պատժի անխուսափելիություն՝ այսինքն՝ նախաքննական և օպերատիվ հետախուզական գործառույթներ»:
««Ելք» դաշինքը հնարավորություն էր ունեցել այդ ունիվերսալ մարմնի գաղափարը դնել իր նախընտրական ծրագրում, և հեղափոխությունից հետո արդարադատության նախարարը մայիսին հայտարարեց, որ ստեղծվելու է այդ մարմինը, բայց ցավոք մինչև օրս որևէ առարկայական քայլ չի արվել այդ ուղղությամբ, և ես այժմ ահազանգում եմ. ժամանակը գնում է․ վարչապետը պետք է գնա այդ քայլերին՝ շուտափույթ ձեռնամուխ լինի այդ կարևորագույն մարմնի ստեղծմանը»- ընդգծեց Կ. Զադոյանը՝ հավելելով, որ ԱԱԾ-ն կոռուպցիայի դեմ պայքարով պետք է զբաղվել ժամանակավոր և չի կարող կրթական և կանխարգելիչ գործառույթներն իրականացնել:
Մանրամասն՝ տեսանյութում:
