«Ներքին և արտաքին քաղաքականությունները սովորաբար բոլոր երկրներում և մեծ քաղաքականությունում փոխկապակցված են, գրեթե միշտ մեկը բխում է մյուսից։ Հայաստանն էլ բացառություն չէ, որովհետև Հայաստանը նույնպես սուվերեն պետություն է, և հիմա այն մտնում է ավելի պրակտիվ փուլ։ Մինչ հեղափոխությունը այդ սուվերենությունը ձևական բնույթ էր կրում»,- «Առաջին լրատվական»-ի հետ զրույցում ասաց քաղաքագետ Հայկ Մարտիրոսյանը։
«Պետք է զգուշ լինել որոշ քայլերում, և երկրների հետ հարաբերությունները ավելի արժանապատիվ ֆորմատի բերելիս ինչ-որ ուժերի մոտ տպավորություն չստեղծվի, որ հակառակ պրոցեսն է գնում։ Ես ուզում եմ մենք մի բան հասկանանք՝ ինչպես շատ պետությունների, այնպես էլ Ռուսաստանի դեպքում կարևոր չէ, թե ինչպիսի վերաբերմունք է դրսևորում Հայաստանը, կարևոր է, թե ինչպես են իրենք տեսնում իրենց շահերը։ Ռուսական կողմում կան ուժեր, որոնք ՀՀ-ում տեղի ունեցած փոփոխությունները բնորոշում են որպես հակառուսական երևույթներ և դրանով առաջացնում են ռեակցիա այն ուժերի մոտ, որոնք մեծ հույսով լցված չեն նոր իշխանությունների և ժողովրդի կամարտահայտման հանդեպ»,- ասաց քաղաքագետը։
Անդրադառնալով Հայաստանում տեղի ունեցող ներքաղաքական պրոցեսներին, մասնավորապես վերջին օրերին շատ քննարկվող հակահեղափոխության շանսերին՝ Մարտիրոսյանը նշեց. «Որտեղ կա հեղափոխություն, այնտեղ կա հակահեղափոխություն, կա թավշյա հեղափոխություն, կա թավշյա հակահեղափոխություն. երբեք չպետք է թերագնահատել հակառակորդին։ Այստեղ խոսքը միայն Հանրապետականի մասին չէ, վերջիվերջո Քոչարյանը հանրապետական չէ. խոսքը բոլոր դեստրուկտիվ ուժերի մասին է, ովքեր երկիրը ոչնչացնելով՝ հասել են նյութական բարիքների։ Այդ ուժերը գտնում են ինչ-որ ելքեր և դրանց շուրջ համախմբվելով՝ փորձում են տապալել հեղափոխությունը։ Պետք չէ հակահեղափոխությունը պատկերացնել հանրապետական նախագիծ միայն»,- ընդգծեց Հայկ Մարտիրոսյանը և ավելացրեց՝ միակ մարդը, ում շուրջը չկա երկու կարծիք, Նիկոլ Փաշինյանն է, ով անվերապահ վստահություն է վայելում։
Հարցազրույցն ամբողջությամբ՝ տեսանյութում: