Որքան էլ հանրության ուշադրության ահռելի մասը գրավում են քրեական գործերն ու աղմկոտ իրավական գործընթացները, որոնցում ներգրավված են նախկին իշխանության տարբեր կալիբրի ներկայացուցիչներ, և որքան էլ արդարադատությունը հույժ կարևոր է պետության հետագա վերափոխման ու զարգացման, այդ թվում՝ նախկին համակարգից անշրջելիորեն ձերբազատվելու համար, ակնհայտ է, որ ժամանակը չի սպասում, որովհետև վերը նշվածից ոչ պակաս կարևոր է նոր համակարգի ձևավորման հաստատակամությունն ու արագությունը: Մյուս կողմից՝ հասկանալի է, որ դրա համար պահանջվում են ֆինանսական ռեսուրսներ: Սկսած Ռոբերտ Քոչարյանից մինչև ամենափոքր պաշտոնյան, որ հայտնվել են իրավական գործընթացի կենտրոնում, ըստ էության հանրության լայն շրջանակներում անվերապահորեն ճանաչված են որպես մեծ կարողության տեր, ունեն ահռելի բիզնեսներ, տարբեր գնահատմամբ՝ նրանք բոլորը միասին տիրապետում են միլիարդավոր դոլարների՝ Հայաստանում և դրանից դուրս: Եվ այստեղ առաջ է գալիս կարևոր հարցերից մեկը, թե քրեական գործընթացները ինչքանո՞վ են արդյունավետ լինելու հասարակությունից ու պետությունից այդ մարդկանց յուրացրած կարողությունները լիարժեք բացահայտելու և, ըստ այդմ, այդ կարողությունը պետությանն ու հանրությանը վերադարձնելու առումով:
Թեմայի շուրջ «Առաջին լրատվական»- ի հետ քննարկմանը մասնակցեցին փաստաբան Սեդա Սաֆարյանը, լեզվաբան Նարինե Դիլբարյանը և քաղտեխնոլոգ Կարեն Քոչարյանը:
«Կա վտանգ, որ Ռոբերտ Քոչարյանը դրսում մնալով՝ կարող է ազդել քննության և ապացույցների վրա, առավել ևս, երբ որ մեծ կարողություններ ու հնարավորություններ ունի, և կարծում եմ՝ ճիշտ էր նրա նկատմամբ կալանքը որպես խափանման միջոց կիրառելը: Եթե Քոչարյանը միլիարդներ ունի և կարող է գրավ մուծել, դա չպետք է գայթակղի դատարանին և պետական այրերին»,- նշեց Ս. Սաֆարյանը:
Կ. Քոչարյանի դիտարկմամբ՝ քաղաքական առումով Հայաստանում այսօր նոնսենս է: Նրա խոսքով՝ որպեսզի դուրս գանք այս իրավիճակից, պետք է խորհրդարանական ընտրություններ լինեն, և որքան շուտ լինեն խորհրդարանական ընտրությունները, այնքան օգուտ կլինի բոլորին: Քաղտեխնոլոգի դիտարկմամբ՝ քանի որ ընդդիմադիր դաշտն ամայացած է, ՀՀԿ-ն այսօր Քոչարյանի մեսիջներից հետո նոր լիդեր է փորձում գտնել:
Ն. Դիլբարյանի խոսքով՝ Քոչարյանն իր հարցազրույցով քաղաքականություն վերադառնալու հայտ ներկայացրեց, հայտարարեց իր քաղաքական ամբիցիաների մասին, բայց այն գործը, որով նա կալանավորվել է, ոչ մի կապ չունի քաղաքականության հետ:
«Վենդետան կապ չունի այն ամենի հետ, ինչ այսօր Հայաստանում ծավալվում է: Մարտի 1-ի բացահայտումը իրավական պետության մեջ արյան վրեժ չէ, դա սահմանադրական կարգը խախտողներին պատասխանատվության ենթարկելն է և սահմանադրական կարգի խախտման հետևանքների կանխումն է»,- նշեց Ն. Դիլբարյանը:
Ս. Սաֆարյանի խոսքով՝ որևէ մեկը չէր կարող գերագույն – գլխավոր հրամանատարի կարծիքը չհարցնել, անհնար է, որ նա չիմանար, որ 0038 հրաման է ծնվել, քոչարյանական ռեպրեսիոն տարիներին որևէ մեկը չէր կարող Քոչարյանից առաջ անցնել ու հրաման ստորագրեր, սահմանադրությամբ սահմանված էր, որ գլխավոր գերագույն հրամանատարն է այդ կարգի հարցերը լուծում:
«Քոչարյանի ազդեցությունը շատ մեծ է, և նրան կալանավորելը պայմանավորված է նաև նրանով, որ մի քիչ զսպեին այդ ազդեցությունը: Նրա մեսիջները քաղաքական այն ուժերը, ում ուղղված էին, անմիջապես հասկացան: Նրանք իրենց բարոյական պարտքերն են մարում և իրենց են փրկում»,- նշեց Ն.Դիլբարյանը:
Մանրամասն՝ տեսանյութում: