Քաղաքապետի պաշտոնը, բացի վարչական կառավարչական շնորհքներ պահանջելուց, նաև քաղաքական պաշտոն է, նա նաև քաղաքականություն է իրականացնելու՝ տնտեսական, սոցիալական, քաղաքի, բիզնեսի, տրանսպորտի զարգացման։ «Առաջին լրատվական»-ի հետ զրույցում այդ մասին ասել է քաղտեխնոլոգ Արմեն Բադալյանը՝ մեկնաբանելով դերասան Հայկ Մարությանի՝ քաղաքապետի թեկնածու դառնալու հավանականությունը։
Ըստ քաղտեխնոլոգի՝ միայն վարչապետի խոսքից է կախված, թե ով կլինի «Քաղպայմանագրի» թեկնածուն։
Բադալյանը նշել է, թե ցանկալի չէ, որ Երևանը վերածվի փորձադաշտի՝ ստուգելու, թե տվյալ անձը կարող է կառավարել, թե ոչ։ «Եթե երևանցիներին ձեռք է տալիս լինել փորձադաշտ, ուրեմն ցանկացած մարդ կարող է դառնալ քաղաքապետ»,- նշել է նա և հավելել, որ կարևոր է, թե ովքեր են լինելու քաղաքապետի տեղակալներ, վարչության պետեր, վարչական շրջանների ղեկավարները։ «Քաղաքապետը նաև պետք է կազմակերպիչ լինի, եթե համարժեք մարդիկ նշանակվեն, և քաղաքը նորմալ զարգանա, ՔՊ վարկանիշը կբարձրանա։ Եթե հակառակը լինի, նվազելու է անձամբ վարչապետի վարկանիշը»,- նշել է Բադալյանը։
Մեկնաբանելով «Քաղաքացիական պայմանագիր» կուսակցության նախագահ Սասուն Միքայելյանի արած Ռեյգանի հետ համեմատությունը և «աշխարհահռչակ շատ քաղաքական գործիչներ դերասան են եղել» արտահայտությունը՝ քաղտեխնոլոգը նշել է, թե դա տեղին համեմատություն չէ։
«Որովհետև Ռեյգանը մինչև նախագահ դառնալը եղել է նահանգապետ, իսկ դա բավական բարդ գործ է։ Դրանից բացի՝ նա մոտ 9 տարի ղեկավարել է Հոլիվուդի դերասանների արհմիությունը, որի բյուջեն 1980-ականներին հասնում էր 9 միլիարդ դոլարի։ Դա բավական բարդ աշխատանք էր։
Այնպես չէ, որ Ռեյգանը կինո նկարելուց հետո գնաց և նախագահ դարձավ, նա որոշակի ճանապարհ էր անցել։ Դրա համար տեղին չէ համեմատել հայ, թեկուզ հարգված դերասանին Ռեյգանի քաղաքական կարիերայի հետ»,- ասել է Բադալյանը։
Համեմատությունն անտեղի է համարում նաև վերլուծաբան Արմեն Բաղդասարյանը։ «Լավ դերասանը գուցե դառնա լավ քաղաքական գործիչ, բայց Երևանի քաղաքապետը պետք է լինի ոչ թե քաղաքական գործիչ, այլ ավելի շատ ադմինիստրատոր, մենեջեր, իսկ դա դերասանի մասնագիտության հետ այնքան էլ կապ չունի»,- նշել է Բաղդասարյանը և հավելել. «Այնպես չլինի, որ հայ հասարակությունը կորցնի լավ դերասան և ձեռք բերի վատ քաղաքապետ։ Ես այդպիսի մտահոգություն ունեմ»։
Ըստ վերլուծաբանի՝ Կարգին Հայկոն շատ սիրված դերասան է, հասարակությունում մեծ վարկանիշ ունի, բայց այդ վարկանիշը կարող է ոչ միայն շատ արագ նվազել, այլև հանգեցնել «Քաղաքացիական պայմանագիր» կուսակցության վարկանիշի անկմանը, եթե քաղաքային խնդիրները պատշաճ ձևով չլուծվեն։ «Դա ամենահաջող որոշումը չէ, եթե իհարկե «Քաղաքացիական պայմանագիրը» որոշի նրան առաջադրել Երևանի քաղաքապետի թեկնածուի պաշտոնում»,- նշել է Արմեն Բաղդասարյանը
