Երևանի ընդհանուր իրավասության դատարանի՝ Նոր Նորք վարչական շրջանի տարածքում գտնվող նստավայրում Արթուր Մկրտչյանի նախագահությամբ մեկնարկեց Տիգրան Առաքելյանի և Հայկ Սարգսյանի գործի դատական քննությունը:
Ըստ մեղադրանքի՝ Տիգրան Առաքելյանն ու Հայկ Սարգսյանը քննությամբ չպարզված այլ անձանց հետ նախնական համաձայնությամբ ՀՀ ԱԺ պատգամավոր Հովհաննես Միշայի Սահակյանից շորթմամբ առանձնապես խոշոր չափերով գումար ստանալու նպատակով 2015 թվականի հունիս-հուլիս ամիսներին համացանցային կապի միջոցների օգտագործմամբ, առանց Հովհաննես Սահակյանի համաձայնության, ապօրինաբար հավաքել ու պահել են վերջինիս վերաբերյալ անձնական գաղտնիք համարվող արատավորող տեղեկություններ:
Այնուհետև այդ տեղեկությունները հրապարակելու սպառնալիքով նույն ժամանակահատվածում Հովհաննես Սահակյանից պահանջել են 47 միլիոն 222 հազար դրամին համարժեք 100 հազար դոլար: Գումարի չափը հետագայում սակարկվել է: Սակայն Հովհաննես Սահակյանը գումար չի տվել:
Տիգրան Առաքելյանին ու Հայկ Սարգսյանին մեղադրանք է առաջադրվել ՀՀ քրեական օրենսգրքի 182 հոդվածի 3-րդ մասի 2-րդ կետով և 144 հոդվածով:
Առաքելյանի ու Սարգսյանի խափանման միջոցը ստորագրությունն է չհեռանալու մասին:
Դատարանը ճշտեց ամբաստանյալների ինքնությունը: Երկուսն էլ նախկինում մեկական անգամ դատվել էին: Առողջության վերաբերյալ երկուսն էլ գանգատներ չներկայացրին:
36-ամյա Հայկ Սարգսյանն ասաց, թե մի քանի օրից կծնվի իր առաջին երեխան:
Ամբաստանյալները մեղադրող դատախազ Արամ Արամյանի դեմ բացարկ չհայտնեցին, հակառակը՝ Տիգրան Առաքելյանը դատախազին անվանեց՝ շատ հարգարժան մարդ:
Ամբաստանյալները դատարան էին ներկայացել առանց պաշտպանների: Հայկ Սարգսյանը հայտարարեց, թե ցանկանում է պաշտպան ունենալ:
Ամբաստանյալներին պաշտպաններով ապահովելու հարցին դատարանը պետք է անդրադառնար, բայց մինչ այդ՝ մեղադրող դատախազ Արամ Արամյանը, գործին ներգրավվելուց անմիջապես հետո, հանդես եկավ միջնորդությամբ՝ գործի քննությունն անցկացնել դռնփակ պայմաններում, քանի որ գործում առկա են տուժողի անձնական կյանքին վերաբերող, անձնական գաղտնիք հանդիսացող տեղեկություններ:
Տուժող Հովհաննես Սահակյանը դատական նիստին չէր ներկայացել: Դատարանի դահլիճում բացի դատական կարգադրիչից ու լրագրողից ոչ ոք չկար:
Ամբաստանյալները չառարկեցին գործի քննությունը դռնփակ անցկացնելու դեմ: Դատարանը որոշեց դատաքննությունը շարունակել դռնփակ կարգով:
