Ռուս միլիարդատեր Իգոր Նեկլյուդովի մահվան հանգամանքների նորանոր մանրամասներ են բացահայտվում։ Պարզվել է, որ տղամարդը մահացել է վթարի մասնակից դառնալուց հետո։ Խաբարովսկի զբոսաշրջային համալիրներից մեկում Նեկլյուդովը վրաերթի է ենթարկել մեկամյա տղայի։
Ականատեսների խոսքով՝ երեխան լուրջ չի վնասվել։ Վրաերթից հետո նա ոտքի է կանգնել, իսկ շտապ օգնության մեքենան տղային տարել է բուժզննման՝ համոզվելու համար, որ ամեն ինչ կարգին է։ Նշվում է, որ Նեկլյուդովն ինքն է հետևել, որպեսզի երեխային անհրաժեշտ բուժօգնություն ցուցաբերեն։
Սակայն ավելի ուշ տեղի ԶԼՄ-ները գրեցին, որ երեխան մահացել է՝ կյանքի հետ անհամատեղելի վնասվածքների հետևանքով։ Ամենայն հավանականությամբ, այդ խանաշփոթի պատճառն այն էր, որ այդ նույն օրը Խաբարովսկում ևս մեկ վթար էր տեղի ունեցել՝ կրկին մեկամյա երեխայի մասնակցությամբ, որը զոհվել է։
Երբ ձեռներեցն իմացել է երեխայի մահվան մասին, իրեն վատ է զգացել և նա մահացել է հիվանդանոցի ճանապարհին՝ կաթվածի հետևանքով։
ԶԼՄ-ների տեղեկությամբ, որն ավելի ուշ հրապարակվեց, Նեկլյուդովը երեխային վրաերթի չի ենթարկել։ Երեխայի հոր խոսքով՝ տղան պարզապես ընկել է նրա ավտոմեքենայի կողքին։
