Դեսպան Պ. Սվիտալսկին այսօր կայացած ասուլիսում ասել է, թե իրենք Հայաստանից են սպասում փոփոխություն, սպասում են նոր գաղափարներ նոր իշխանությունից: Եվրոպական պատվիրակության ղեկավարի դիտարկումն, անշուշտ, տեղին է, Հայաստանը պետք է առավել առարկայորեն ներկայացնի Բրյուսելին, թե ինչ փոփոխություն է ընկալում, ինչ տեսքով, ինչ ծավալով, բովանդակային ինչ ուղղություններով: Ներկայացրե՞լ է այդ ամենը վարչապետ Նիկոլ Փաշինյանը Բրյուսել կատարած այցի և հանդիպումների ժամանակ, թե ոչ, դեռ պարզ չէ: Այդ հարցը, սակայն, կարևոր է և ունի պարզաբանման կարիք, որպեսզի Հայաստան-ԵՄ հարաբերությունը չդառնա թյուրըմբռնման զոհ, առավել ևս, որ առանց այդ էլ դրանք արժանացել են ու արժանանում են տարատեսակ մանիպուլյացիաների ու հարվածների:
Թեմայի շուրջ «Առաջին լրատվական»- ի հետ զրույցում Հայաստանի ԱԳՆ մամլո խոսնակ Տիգրան Բալայանը, անդրադառնալով Սվիտալսկու ուշագրավ հայտարարություններին, նշեց, որ ողջունելի են նրա տեսակետները, ըստ որոնց՝ ԵՄ-ն պատրաստ է բավարարել Հայաստանի ակնկալիքները՝ ֆինանսական, տեխնիկական, կազմակերպչական աջակցություն ցուցաբերել, և սպասում է մեր կողմից առաջարկների: «Փաստորեն ԵՄ-ն իր դեսպանի շուրթերով աջակցություն է հայտնում մեր ակնկալիքներին»,- նշեց Բալայանը:
ԱԳՆ մամլո խոսնակի դիտարկմամբ՝ Ժողովրդավարական մեր ընթացքի դեմ Ադրբեջանը դրսևորում է ագրեսիա: Նրա խոսքով՝ վարչապետ Փաշինյանը Բրյուսելում հստակ ուղերձ հնչեցրեց՝ Ալիևը վախենում է, որ Հայաստանում ընթացող ժողովրդավարական գործընթացները կարող են տեղափոխվել Ադրբեջան:
Անդրադառնալով հարցին՝ արդյո՞ք մենք ունենք անհրաժեշտ գործիքակազմ, որպեսզի կարողանանք Ադրբեջանին ևս ստիպել հարգել ձեռք բերված պայմանավորվածությունները, Բալայանը նշեց. «Որպեսզի բանակցությունների դինամիկան վերսկսվի, ապա անհրաժեշտ է ապահովել խաղաղությանը նպաստող մթնոլորտ»: Նրա դիտարկմամբ՝ Ադրբեջանը դրժում է իր խոստումները, արհամարհում է պայմանավորվածությունները:
«ՀՀ վարչապետի և Ադրբեջանի նախագահ Ալիևի հանդիպումը նախապատրաստելու համար հարկավոր է բովանդակություն: Հայաստանի և միջազգային հանրության, համանախագահների փորձը վկայում է, որ ամեն անգամ նախապատրաստվել է հանդիպում բարձրագույն մակարդակով, ընդունվել են պայմանավորվածություններ և եղել են հայտարարություններ, որոնց տակ գրված է եղել նաև Ադրբեջանի նախագահի անունը, բայց թանաքը դեռ չչորացած՝ պայմանավորվածությունը անմիջապես խախտվել է: Հիմա եթե վարչապետ Փաշինյանը հանդիպի Ալիևի հետ, ինչի՞ շուրջ է խոսելու, երբ որ մենք ասում ենք՝ եկեք կատարենք պայմանավորվածությունները, գոնե մասնակի, որը թույլ կտա առաջ շարժվել, չկրակել, ազգային թշնամանքի քարոզը դադարեցվի, որպեսզի կարողանանք նստել և բանակցել փաստաթղթի հիմնարար սկզբունքների շուրջ, իսկ Ադրբեջանն ասում է՝ ամեն ին կամ ոչինչ… Սա միջազգային հարաբերություններում չլսված գործելաոճ է: Ապրիլյան պատերազմը ցույց տվեց, որ Ադրբեջանը մեզ հետ խոսում է ուժի դիրքերից, բայց տապալվեց: Մենք Ադրբեջանից վախենալու չունենք… Մենք չենք խոսում փոխզիջումների մասին, այլ՝ պայմանների, որոնց առկայության դեպքում կարող ենք բանակցել»,- նշեց Բալայանը:
Նա նաև ընդգծեց, որ ՌԴ-ից սպառազինություն է ներկրվել թե՛ մեր, թե Ադրբեջանի կողմից. «Ալիևը գովազդում է, մենք կարիք չունենք գովազդելու… Սպառազինության հարցում «լոպազանալու», գլուխ գովալու կարիք չունենք: Մեր սպառազինությունը կարող է հնարավորություն տալ ոչ միայն պաշտպանվելու, այլ նաև Ադրբեջանին լուրջ վնաս հասցնելու»:
Մանրամասն՝ տեսանյութում:
