Ինչպես գրում է ռուսական Коммерсант-ը, Ուկրաինայի նախագահ Վիկտոր Յանուկովիչը փոխել է արտաքին քաղաքական ուղին և հիմա ավելի ակտիվ, քան նրա նախորդը՝ Վիկտոր Յուշչենկոն, իրականացնում է իր երկրի առավել սերտ համարգործակցության քաղաքականությունը ՆԱՏՕ-ի հետ: Վերջինիս հետ քննարկվում են Մոսկվայի համար ցավոտ այնպիսի հարցեր, ինչպիսիք են Սևծովյան նավատորմի ապագան, հակահրթիռային պաշտպանության համակարգը, Մերձդնեստրյան կարգավորումը, Ուկրաինայի հետախուզության բարեփոխումները, Ուկրաինայի էներգետիկ և տնտեսական անվտանգությունը և նույնիսկ արտաքին քաղաքական հայեցակարգը:
Թերթի տրամադրության տակ է հայտնվել մի փակ փաստաթուղթ, որը նվիրված է Ուկրաինա-ՆԱՏՕ զորավարժությունների օրակարգին: Փաստաթղթի համաձայն, միայն այս տարի նախատեսված է 64 միջոցառում այս համագործակցության շրջանակներում: Նշվում է, որ փակ դռների ետևում քննարկվելու են այս խնդիրները: Հատկանշական է, որ քննարկվող թեմաներից ամենածավալունը Ուկրաինայի արտաքին քաղաքականության ընդհանուր սկզբունքներն են։ ՆԱՏՕ-ի հետ քննարկվելու է նաև այդ երկրի արտաքին քաղաքական ռազմավարությունը:
Այս մասին Մոսկվայում տեղյակ են: Դումայի հանձնաժողովի նախագահ Կոնստանտին Կոսաչովն ասել է, որ իրենց համար Ուկրաինայի գործողությունները ՆԱՏՕ-ի հետ թափանցիկ չեն: «Կիևի գործողություններում մենք տեսնում ենք անհետևողականություն: Մեզ ասում են մի բան, անում՝ ուրիշ: Դա ցավալի է, և մենք դրանք կարձագանքենք»,- ասել է Կոսաչովը:
Ուկրաինայի կառավարությունում Коммерсант-ի բարձրաստիճան աղբյուրն ասել է, որ Ուկրաինայի արտաքին քաղաքական փոփոխությունները պայմանավորված են Ռուսաստանի կողմից վարվող քաղաքականությամբ, ուր շատ հարցերում բացակայում է կողմերի հավասարությունը:
«Մենք պատրանք ունեինք, որ եթե Ռուսաստանի հետ հարաբերություններում հանեինք այնպիսի խնդրահարույց հարցեր, ինչպիսիք են Հոլոդոմորի ճանաչումը, ՆԱՏՕ-ին Ուկրաինայի անդամակցությունը, Սևծովյան նավատորմի ժամկետի երկարացման հարցը, ապա ամեն ինչ կբարելավվի: Սակայն դա տեղի չունեցավ: Մոսկվան ցանկանում է, որպեսզի մենք գտնվենք իր ուղեծրում և դրա համար նաև վճարենք»,- ասել է աղբյուրը:
Նրա խոսքերով՝ Կիևին նման դիրքրոշումը դուր չի գալիս, և քանի որ հավասարների երկխոսություն չկա, Կիևը պատրաստվում է մերձենալ Եվրոպայի հետ: «Այդ մենք չենք հեռանում Ռուսաստանից, նա է մեզ ետ մղում»,- ասել է պաշտոնյան՝ հավելելով, որ «իրենք շարունակում են բանակի բարեփոխումները Դաշինքի օրինակով, և դա գաղտնիք չէ»:
