«Ադրբեջանը չի թաքցնում իր ռազմական հավակնությունները և անգամ նրանց պաշտպանության նախարարն է բացահայտ հայտարարում, որ Իլհամ Ալիևը իրենց հրահանգել է պատրաստ լինել պատերազմի։ Ինչ վերաբերում է զորահանդեսին, ապա սովորաբար զորահանդեսների ժամանակ զինատեսակների ցուցադրումն ուժի ցուցադրում է նշանակում և դրան կարող են հաջորդել կամ չհաջորդել ռազմական գործողություններ։ Բացի դրանից, այդ զորահանդեսն ունի նաև հոգեբանական ազդեցության գործոն, բայց, եթե հետևում ենք Ադրբեջանի վերջին շրջանի գործողություններին՝ թեկուզև Նախիջևանի հատվածում, երբ չեզոք գոտու հաշվին իրենց համար որոշակի բարելավումներ են արել, բայց հանրությանը մատուցում են դա իբրև «ազատագրում» կամ ձեռքբերում, ապա սա նշանակում է նաև իրենց ժողովրդին հոգեբանորեն պատրաստել պատերազմի»,- «Առաջին լրատվական»-ի հետ զրույցում ընդգծեց ռազմական փորձագետ Արթուր Եղիազարյանը՝ խոսելով հունիսի 26-ին Ադրբեջանում տեղի ունեցած զորահանդեսի մասին։
Ռազմական փորձագետի խոսքերով, հայկական կողմը միշտ պետք է գիտակցի, որ պատերազմը չի ավարտվել և ունենք մի այնպիսի հակառակորդ, որից ամեն րոպե սպասելի են ռազմական գործողություններ։
«Մենք պետք է հասկանանք, որ այդ երկիրը մեր թշնամին է և ամեն րոպե պետք է համապատասխան ձևով պատրաստ լինենք՝ և դիվանագիտական դաշտում և ռազմական դաշտում համարժեք արձագանքելու համար։
Հայկական բանակը հասկանում է վտանգը, հասկանում է ռիսկերը՝ հատկապես 2016թ-ի ապրիլյան գործողություններից հետո և այս առումով բավականին լուրջ աշխատանքներ են տարվել բոլոր ուղղություններով՝ սկսած մարտավարական պատրաստությունից ընդհուպ մինչև անձնակազմի բարոյահոգեբանական պատրաստություն»,-շեշտեց Եղիազարյանն ու միևնույն ժամանակ հավելեց․
«Այս իրավիճակում մեր մոտեցումը պետք է լինի այնպիսին, որ մենք ամեն օր պետք է սպասենք, եթե անգամ չկա այդ վտանգը՝ կապ չունի, մենք պետք է սպասենք․ այս հոգեբանությամբ պետք է այսօր մեր ծառայությունը տանենք, որովհետև ունենք այնպիսի հակառակորդ, որը իրենց համար հարմար պահի դեպքում չի վարանելու փորձել զինված ճանապարհով խնդիրը լուծել, ինչպես դա եղավ 2016թ-ի ապրիլին, առավել ևս այն պարագայում, երբ տարածաշրջանային որոշակի փոփոխություններ են սպասվում և դրա հետ կապված դիրքավորումներ են կատարում այդ երկրները, ուստի մենք այս հանգամանքները չպետք է անտեսենք և պիտի ավելի մեծացնենք մեր զգոնությունը»։
Մանրամասները՝ տեսանյութում։
