Ստեփանակերտի «Ազգային վերածնունդ» կուսակցության նախագահ Հայկ Խանումյանը հանդես է եկել հայտարարությամբ, որում մասնավորապես ասվում է.
«Վերջին օրերին ինձ անընդհատ զանգում են Ազգային վերածնունդ կուսակցության անդամներ տարբեր գյուղերից և հայտնում, որ իրենց հրավիրում են գյուղապետի մոտ և հարցնում կուսակցության անդամակցության մասին:
Հայտնում են նաև, որ գյուղապետերին այցելում են ԼՂՀ Ազգային անվտանգության ծառայությունից, հայտնում կուսակցականների մասին, ապա սկսվում է տարբեր տեսակի ճնշումները կուսակցականների վրա: Ես նոր հեռախոսով խոսացի Դաշուշենի գյուղապետի հետ, վերջինս տեղեկացրեց, որ իրեն «վերևից են» նման ցուցումներ տվել: Գյուղապետը հաղորդեց, որ իրենց գյուղում չեն իմացել, որ կուսակցությունը «հակակառավարական է», այլ բնակիչներն ուղղակի հավանել են կուսակցության ծրագիրը, մասնավորապես՝ գյուղական ենթակառուցվածքների զարգացման և գյուղական աղքատության կրճատման բաժինը: Գյուղապետն ինձ հետ զրույցում հաստատեց, որ իրեն այցելել են ԼՂՀ ԱԱԾ-ից՝ ԱՎԿ դաշուշենցի անդամների ցուցակով հանդերձ: Օրեր առաջ նման դեպք եղել էր նաև Մարտակերտի շրջանի Քոլատակ գյուղում:
Մեր կուսակցությունը վերջին շրջանում ակտիվ գործունեություն էր ծավալում և հանդես գալիս հայության ինքնիշխանությունը սահմանափակող գործողությունների դեմ: Ամենևին զարմանալի չէ, որ ԼՂՀ ԱԱԾ-ն այսօր փորձում է իրեն հատուկ մեթոդներով վախեցնել կուսակցությանն անդամագրված բնակիչներին: ԼՂՀ ԱԱԾ-ն ղեկավարում է Վիկտոր Քոչարյանը, խորհրդային տարիներին ադրբեջանական ՊԱԿ-ի աշխատակից, որը ժամանակին ակտիվորեն գործել է Ղարաբաղյան շարժման դեմ: Եվ բոլորովին էլ զարմանալի չէ, որ այս գործիչը և նրա ղեկավարած ծառայությունը կրկին ակտիվացել է հայության ինքնիշխանության համար պայքարող ուժերի դեմ:
Եթե Վ. Քոչարյանը կամ նրա ծառայակիցները ցանկանում են զբաղվել քաղաքականությամբ, ապա կարող են հրաժարվել իրենց պաշտոններից և հիմնել կուսակցություն կամ անդամագրվել իշխող կուսակցություններից մեկին, ոչ թե փորձեն գործել այնպես, ինչպես 80-ականների վերջերին կամ 90-ականների սկզբներին: Այն ժամանակ ձեզ ներեցին, հիմա գուցե այդպես չստացվի:
Հիշեցնում եմ Վիկտոր Քոչարյանին, որ ԼՂՀ Սահմանադրությունն ու օրենքները ենթակա են հարգանքի բոլորի կողմից, ինչ պաշտոն էլ նա զբաղեցնի: Եթե որոշ մարդկանց համար դեռ թանկ են Ադրբեջանին մատուցած ծառայությունները և Արցախում իրենց պահում է միայն կերակրատաշտին մոտ լինելը, ապա խորհուրդ եմ տալիս գոնե ենթարկվել այն օրենքներին և Սահմանադրությանը, որն Արցախի ժողովուրդն է ընդունել: Անտեսելով այս ամենը՝ դուք ինքներդ ձեզ դնում եք օրենքից դուրս՝ սրանից բխող բոլոր հետևանքներով:
Քաղաքացիների՝ քաղաքականությամբ զբաղվելու և կուսակցություններին անդամագրվելու իրավունքը սահմանադրորեն հաստատված և համընդհանուր ճանաչում ստացած նորմ է: Եթե ոմանք դեռ չեն կարողանում հաղթահարել խորհրդային մտածելակերպը, ապա մեր կուսակցությունը պատրաստ է հատուկ նրանց համար Արցախի Սահմանադրության և սահմանադրական իրավունքի վերաբերյալ դասընթացներ կազմակերպել: Եթե հայության ինքնիշխանության դեմ տարվող վերջին ժամանակների քաղաքականությունը ոգևորել է այս մարդկանց, ապա իմացեք, որ ձեր ոգևորությունը հանգցնելու, հայության ինքնիշխանությունը պաշտպանելու պատրաստ ուժեր դեռևս կան:
Միևնույն ժամանակ կոչ եմ անում ԱԱԾ բոլոր այն ծառայակիցներին, որոնք չեն աշխատել խորհրդային/ադրբեջանական ՊԱԿ-ում, որոնց համար թանկ է ազգային անվտանգությունը և հայ ազգի ինքնիշխանությունը, լինեն սկզբունքային և չկատարեն հակասահմանադրական հրամաններ»:
