Չիկագոյում իրավապահ մարմինները շաբաթական մի քանի անգամ իրականացնում են «Անվտանգ ճանապարհ» օպերացիան: Զինված պարետներն ուղեկցում են երեխաներին, որպեսզի վերջիններս անվտանգ հասնեն Չիկագոյի հարավային թաղամասերում գտնվող իրենց տները: Այդ թաղամասերում գլխավոր սպառնալիքը ներկայացնում են փողոցային հանցախմբերը: Նախորդ տարի փոխհրաձգությունների ժամանակ այստեղ առնվազն 500 մարդ է զոհվել:
Սաութսայդի որոշ թաղամասերում հանցագործներն իրենց այնքան ազատ են զգում, որ չեն վախենում նույնիսկ սպանել սեփական հարևաններին: Այդ պատճառով էլ աշակերտներին դասերից հետո տուն ուղեկցելը հատուկ գործողության է վերածվում, հաղորդում է Sky News-ը:
Սկզբում դպրոցից դուրս է գալիս ուսմասվարը, որն ուշադրությամբ ստուգում է բակը: Հետո նա դպրոցից դուրս է թողնում երեխաներին և ոստիկանություն զանգահարում: Զինված ոստիկանները երեխաներին տուն են ուղեկցում, իսկ մյուս սպաները հսկում են հարևան փողոցները:
