ՀՀ նախագահի և կառավարության լրատվական ծառայություններից առայժմ չկարողացան հստակ տեղեկատվություն տալ, թե արդյոք այս մարմինները որևէ քայլ կձեռնարկե՞ն անվանի արձակագիր Լևոն Խեչոյանին Գերմանիայից Հայաստան տեղափոխելու համար:
Լևոն Խեչոյանը բուժման նպատակով այդ երկրում է գտնվում հոկտեմբերի կեսից: Նրա վիճակը, սակայն, չի բարելավվում: Մոտ երկու շաբաթ առաջ նրան կրկին վիրահատել են: Գրողը ևս մեկ անգամ Գերմանիայում վիրահատության էր ենթարկվել, ամիսներ առաջ:
«Ցավոք, Գերմանիայում կյանքի սահմանագծին մաքառող Լևոն Խեչոյանի հետվիրահատական վիճակն օրհասական է: Բժիշկները խորհուրդ են տալիս նրան անկողնային վիճակում տեղափոխել Հայաստան, ինչը ընտանիքի հնարավորությունների սահմաններից դուրս է»,- ֆեյսբուքյան էջում գրել էր Ծաղկաձորի գրողների ստեղծագործական տան տնօրեն Մովսես Մանուկյանը, որն արձակագրի մտերիմ ընկերն է:
Մ.Մանուկյանը նաև նշել է, թե, Խեչոյանի վիճակի մասին տեղեկացնելով՝ նպատակ ունի իրազեկել պատկան մարմիններին: «Գերմանիայում բուժման կազմակերպման գործընթացին որևէ կերպ օժանդակություն չցուցաբերած ՀՀ կառավարությունը, կարծում ենք, հիմա արագ ինչ-որ բան պետք է ձեռնարկի»,- գրել է նա:
Թե՛ կառավարությունից, թե՛ նախագահականից որևէ կոնկրետ բան չպատասխանեցին, թե արդյոք որևէ քայլ ձեռնարկե՞լ են կամ մտադի՞ր են ձեռնարկել անվանի արձակագրին Հայաստան տեղափոխելու համար: Մշակույթի նախարարության հասարակայնության լրատվական ծառայությունից այսօր մամուլին ընդամենը փոխանցել են, թե «նախարարը տեղյակ է խնդրին, և այս պահին միջոցառումներ են ձեռնարկվում», սակայն չի հստակեցրել, թե ինչ քայլեր պետք է ձեռնարկեն:
Տեղեկացնենք նաև, որ Լ.Խեչոյանին պետք է տեղափոխեն անկողնով, և դա բավականին մեծ խնդիր է Գերմանիայում միայնակ գտնվող նրա ընտանիքի համար: Ընդ որում՝ արձակագրի հետ այդ երկրում են նրա կինն ու որդին: Բանն այն է, որ նրան տեղափոխելու համար անհրաժեշտ է որոշակի պայմանավորվածություններ ձեռք բերել այն ավիաընկերության հետ, որի միջոցով նա պետք է Հայաստան վերադառնա:
«Առաջին լրատվական»-ին փոխանցեցին, թե անհրաժեշտ է ինքնաթիռի սրահից հանել որոշ նստատեղեր, որ հնարավոր լինի արձակագրի անկողինն այնտեղ տեղավորել: Բացի դրանից՝ ավիաընկերությունները պայման են դնում, որ նման դեպքում նրան պետք է ուղեկցեն նաև բժիշկ և բուժքույր: Իսկ այդ ամենն ապահովելու համար անհրաժեշտ է թե՛ կազմակերպչական, թե՛ ֆինանսական օժանդակություն:
Հիշեցնենք նաև, որ այս տարվա մայիսին Լևոն Խեչոյանը չընդունեց Հայրենիքին մատուցած ծառայությունների համար նրան շնորհված ՀՀ նախագահի շքանշանը: Նա ասել էր, թե չի կարող ընդունել այն, երբ այս չափի արտագաղթ կա երկրում, և երբ իր «եղբայր ազատամարտիկները, չդիմանալով սոցիալական ծանր պայմաններին, հենց այսօր էլ նստացույց են անում»: Ազատամարտիկն ինքը մասնակցել է Ղարաբաղյան պատերազմում և եղել է Սասուն Միքայելյանի ջոկատի անդամ: Նախկինում` 2008-ի մարտի 1-ի իրադարձություններից հետո, Լևոն Խեչոյանը մերժել էր իշխանության` մշակույթի ներկայացուցիչների հետ հանդիպման հրավերը` ասելով, թե երկրում քաղբանտարկյալների առկայության փաստն իրեն թույլ չի տալիս իշխանության հետ գնալ նման հանդիպման:
Իսկ ՀՀ իշխանությունները այս դեպքում խուսափել են նրան օգնել: Մինչդեռ այս տարի նախագահական ընտրություններից հետո կառավարությունը 20 մլն դրամ հատկացրեց նախագահի թեկնածու Պարույր Հայրիկյանին՝ նրա նկատմամբ կատարված մահափորձի հետևանքով վիրավորված ձեռքը նույն Գերմանիայում բուժելու համար:
