Ազգային ժողովի ՕԵԿ խմբակցության անդամ Հովհաննես Մարգարյանի գնահատմամբ՝ 2014թ. պետական բյուջեն սոցիալական է: Դեկտեմբերի 13-ին լրագրողների հետ հանդիպմանը նա նշեց, որ ՕԵԿ-ի հիմնական առաջարկությունները կառավարությունն ընդունել է, իսկ կուսակցության ծրագրերը դեռևս կոալիցիոն պայմանագրի ստորագրման ժամանակ են ներառվել կառավարության կարճաժամկետ և երկարաժամկետ ծրագրերում:
Մարգարյանը նշեց, որ «պարտադիր» բաղադրիչի հետ կապված՝ կենսաթոշակային նոր համակարգի առթիվ Սահմանադրական դատարան բողոքարկելն ընդդիմադիրների իրավունքն է, և այդ առումով ինքն ըմբռնումով է մոտենում գործընկերների մտադրությանը: ՍԴ հետ ՕԵԿ-ական պատգամավորը քանիցս առնչվել է՝ տարբեր օրենքների հետ կապված՝ գազի սակագների հարցով, երբ իրեն հաջողվել է դատը շահել, և շուրջ ութ տոկոս գազի գինն իջել է, ՍԴ-ում վիճարկել է համամասնական ընտրակարգով ընտրված պատգամավորների մանդատից հրաժարվելու հարցը, երբ որոշում է կայացվել, որ բացի առաջին երեք համարից` մյուս պատգամավորները, խմբակցությունից դուրս գալու դեպքում, պետք է վայր դնեն մանդատը: «Պարտադիր կուտակային կենսաթոշակային համակարգի ներդրման առումով շատ կարևոր է երաշխիքը, որը տալիս է պետությունը: Պետք է կարողանանք բարեփոխումներ անել, որպեսզի երաշխիքները հստակ լինեն: Կարծում եմ՝ փոփոխությունները կլինեն առաջին վեց ամսում»,- ասաց նա՝ նաև նշելով, որ կսպասի ու կհետևի՝ ինչ որոշում է կայացնելու Սահմանադրական դատարանը:
Լրագրողները հետաքրքրվեցին՝ ՕԵԿ դերը քաղաքական կյանքում ինչպիսի՞ն է, ի՞նչ կշիռ ունի այդ ուժը: Ի պատասխան՝ Մարգարյանը նշեց, որ իրենց քաղաքական ուժը միշտ կարևոր դերակատարություն է ունեցել քաղաքական կյանքում. «Չթվարկեմ մեր արած գործերը: Որտեղ լավ գործ կա, ՕԵԿ-ը դրա մեջ է: Կա՛մ նախաձեռնել է, կա՛մ դրա թիկունքում է»,- նշեց պատգամավորը: Նա տեղեկացրեց, որ շարունակական է լինելու ԽՍՀՄ ավանդների փոխհատուցման գործընթացը: 62 հազար ավանդատու արդեն ստացել է ավանդները, սակայն աղետի գոտում անօթևանները դեռևս քիչ չեն, ուստի հաջորդ տարի ևս 1000 ընտանիք ապահովվելու է բնակարանով:
ՕԵԿ-ական պատգամավորը նշեց՝ իրենց շնորհիվ է, որ ավելացան ծնվող երրորդ, չորրորդ երեխայի համար հատկացվող գումարները: Խոսելով Դավութօղլուի այցի մասին՝ Մարգարյանը նշեց, որ Սևծովյան տնտեսական համագործակցության կազմակերպության առաքելությունը տնտեսական փոխգործակցությունն է, և բոլոր քննարկումների ժամանակ իրենց կողմից առաջին պլան են մղվում տնտեսական հարաբերությունները: «Բայց ի՞նչ տնտեսական համագործակցության մասին կարող է խոսք լինել, երբ կազմակերպության անդամ երկրներից մեկը շրջափակում է իրականացնում այդ կազմակերպության անդամ մյուս երկրի նկատմամբ: Դիվանագիտական տեսանկյունից ավելի ջերմ ընդունելության Դավութօղլուն չէր էլ կարող արժանանալ: Որևէ քայլ պետք է կատարվեր` գոնե փակ սահմանների մասին պետք է խոսեր: Թուրքիան վաղ թե ուշ պետք է հրաժարվի հայ-թուրքական սահմանի բացման հարցը կապել Արցախյան խնդրի հետ, և դա անի ոչ թե խոսքով, այլ գործուն քայլերով»,- համոզմունք հայտնեց բանախոսը:
Հարցին՝ ինչու ՕԵԿ երիտթևը նույնպես դուրս չեկավ և չմիացավ Դավութօղլուի այցի դեմ իրականացված բողոքի ակցիային, Մարգարյանը դժվարացավ պատասխանել:
