Թուրքիայի ԱԳ նախարար Ամեդ Դավութօղլուի այցի մեջ որևէ ինտրիգ չկար: Այսօր կայացած մամուլի ասուլիսի ժամանակ այս մասին ասաց քաղաքագետ Անդրիաս Ղուկասյանը՝ հավելելով, որ նրա և ՀՀ արտգործնախարարի միջև մեկ ժամից ավելի տևած քննարկման հիմնական թեման, ամենայն հավանականությամբ, եղել են հայ-թուրքական արձանագրությունները:
«Քանի որ հանդիպումը փակ է եղել, մեզ մնում է միայն ենթադրություններ անել»,- ասաց նա:
Ասուլիսի մյուս բանախոս՝ ՀՀԿ-ական պատգամավոր Արտակ Դավթյանն իր հերթին նկատեց, որ Թուրքիայի ցանկացած քայլ հաշվարկված է, ինչպես հաշվարկված էր այդ երկրի ԱԳ նախարարի՝ Երևան կատարած այցը:
«Դավութօղլուի՝ Հայաստան գալը Հայոց ցեղասպանության հարյուրամյակին ընդառաջ կատարված ցուցադրական քայլ էր՝ օվկիանոսից այն կողմ հարևաններին համոզելու, որ Թուրքիան ինչ-ինչ հարաբերություններ է փորձում հաստատել Հայաստանի հետ: Բայց պետք է հիշել. Թուրքիան մեկ անգամ խաբեց մեզ՝ ամոթ իրեն, եթե խաբի երկրորդ անգամ՝ ամոթ կլինի մեզ»,- նշեց ԱԺ պատգամավորը:
Հիշեցնենք, որ Թուրքիայի ԱԳ նախարարը դեկտեմբերի 12-ին ժամանել էր Երևան՝ մասնակցելու Սևծովյան տնտեսական համագործակցության երկրների արտգործնախարարների նիստին:
Լուսանկարը` PanARMENIAN Photo-ի
