Երեկ Ազգային ժողովում մի շարք օրինագծերի քվեարկության ժամանակ Հանրապետական խմբակցության երկու պատգամավորներ` Արթուր Ստեփանյանը և Մհեր Սեդրակյանը՝ Թոխմախի Մհերը, քվեարկում էին իրենց կողքին նստող, բայց նիստերին բացակայող երկու այլ ՀՀԿ-ական պատգամավորների փոխարեն: Ա. Ստեփանյանը քվեարկում էր ջավախահայ պատգամավոր Հովհաննես Սոֆոյանի, իսկ Մ. Սեդրակյանը՝ մշտապես այլ երկրներում գտնվող Աշոտ Արսենյանի փոխարեն: Երբ պատգամավորները նկատեցին, որ լրագրողները հետևում են իրենց քվեարկություններին՝ դադարեցին գործընկերների փոխարեն քվեարկել:
Մինչ այս նրանք իրենց գործընկերների փոխարեն «կողմ» էին քվեարկել, օրինակ, «Կուտակային կենսաթոշակների մասին օրենքում լրացումներ և փոփոխություններ կատարելու մասին» օրինագծին: Ա. Ստեփանյանը Հ. Սոֆոյանի փոխարեն «կողմ» էր քվեարկել նաև «Պետական պաշտոններ զբաղեցնող անձանց վարձատրության», «Ժամանակավոր անաշխատունակության նպաստների» մասին և այլ օրինագծերին: Իսկ ահա 2014թ. բյուջեի քվեարկության ժամանակ նրանք արդեն չքվեարկեցին իրենց բացակայող գործընկերների փոխարեն: Երեկ, սակայն, խորհրդարանում պատգամավորների քվեարկություններն այնպիսի պատկեր ունեին, որ բոլորովին էլ պետք չէր այն կեղծել, սակայն ՀՀԿ-ական այդ պատգամավորները սովորույթի ուժով սեղմում էին իրենց գործընկերների կոճակները:
Նիստի ավարտից հետո արդեն Մ. Սեդրակյանից փորձեցինք ճշտել, թե ինչու էր քվեարկում իր բացակա գործընկերոջ փոխարեն: Ի պատասխան այսպես ասաց. «Դա ձեզ է թվացել», ապա ավելացրեց, թե այսուհետ իրեն հարցեր տալու համար գրավոր դիմեն:
