Իտալիայի նախկին վարչապետ Սիլվիո Բեռլուսկոնին կոչ է անում երկրում նոր քաղաքական ընտրություններ անցկացնել՝ միաժամանակ Եվրախորհրդարանում քվեարկության հետ, որը տեղի է ունենալու մայիսի 24-ին: Ինչպես հաղորդում է ITAR-TASS-ը, այս մասին քաղաքական գործիչն ասել է «Եվրոպա-1» ֆրանսիական ռադիոկայանին տված հարցազրույցի ժամանակ:
Բեռլուսկոնին, ով դատապարտվել է ֆինանսական խարդախության համար, և այս կապակցությամբ նրան հանել են խորհրդարանից, չի թաքցնում, որ ընտրական քարոզարշավ է սկսել:
«Մենք փորձում ենք համոզել 24 միլիոն իտալացիների, որոնք դեռևս չեն որոշել քվեարկել հօգուտ ձախակենտրոնների: Այդ կառավարությունը չի ընտրվել ժողովրդի կողմից, մայիսի 24-ին կկայանան եվրոպական ընտրություններ: Մենք կհասնենք նրան, որ միաժամանակ տեղի կունենան նաև Իտալիայի խորհրդարանի ընտրություններ»,- ասել է Բեռլուսկոնին:
Անդրադառնալով ձերբակալության հավանականությանը խորհրդարանական անձեռնմխելիությունից զրկվելու կապակցությամբ՝ նախկին վարչապետը նշել է, որ այդ դեպքում հեղափոխություն կլինի:
«Հեշտ չէ մարդուն ճաղերի հետևում փակել, երբ նա նախընտրական քարոզարշավ է վարում, իսկ նրա հետևից գնում է մեծամասնությունը»,- կարծում է Բեռլուսկոնին:
Նշենք, որ չորեքշաբթի Էնրիկո Լետայի կառավարությունը վստահության քվե է ստացել խորհրդարանի երկու պալատներում:
