Մոսկվայում Հայաստանի պատվիրակությունը կքննարկի Մաքսային միությանն անդամակցելու «ճանապարհային քարտեզը»: Ինչպես հաղորդում է «Իզվեստիա»-ն, պատվիրակության մեջ են ինը փոխնախարարներ, այդ թվում՝ արտաքին գործերի, էկոնոմիկայի, ֆինանսների, գյուղատնտեսության, մաքսային, հարկային և վիճակագրական ծառայության:
Ռուսական կողմից նիստին կմասնակցի ինտեգրման և մակրոէկոնոմիկայի հարցերով Եվրասիական տնտեսական հանձնաժողովի նախարար Տատյանա Վալովայան:
«Հայաստանի եվրաինտեգրումը միայն կլրացնի ՄՄ-ին անդամակցելու գործընթացը, քանի որ այն կառուցվում է միջազգային սկզբունքների վրա և միջազգային փորձի կիրառմամբ»,- թերթին հաղորդել է Հայաստանի էկոնոմիկայի նախարարի առաջին տեղակալ Կարինե Մինասյանը և հավելել, որ ինքը չի ցանկանում խոսել որևէ հակասությունների մասին, քանի որ այդ միության երկրները լսում են Հայաստանի կարծիքը:
Միևնույն ժամանակ նա կարծում է, որ անհրաժեշտ է Հայաստանի օրենսդրությունը ներդաշնակեցնել Մաքսային միության կանոններին: Օրինակ՝ Երևանը պետք է ընդունի ՄՄ մաքսային կոդեքսը՝ սահմանելով որոշ կետեր, որոնք կապված են ապրանքների տեղաշարժման մասին տեղեկատվության փոխանցման հետ:
Հայաստանը և Ռուսաստանն ընդհանուր սահմաններ չունեն, ինչը զգալիորեն բարդացնում է առևտրային շփումները: Սակայն Երևանում կարծում են, որ այս խնդիրը կարելի է հաղթահարել:
Թերթը նշում է, որ դեկտեմբերի 13-ին տեղի կունենա Եվրասիական տնտեսական հանձնաժողովի խորհրդի նիստ՝ փոխվարչապետների մակարդակով, իսկ դեկտեմբերի 24-ին կստորագրվի «ճանապարհային քարտեզը»՝ Եվրասիական տնտեսական գերագույն խորհրդի ժողովին:
Դեկտեմբերի սկզբին Երևանն արդեն ստացել է զեղչեր ռուսական արտահանման իր համար ամենազգայուն ապրանքների համար՝ գազ, նավթամթերք, ադամանդ: Եվրասիական զարգացման բանկում հաշվարկել են, որ Հայաստանի էկոնոմիկան կունենա 140 միլիոն դոլարի եկամուտ միայն Ռուսաստանի կողմից գազի մաքսատուրքի չեղյալ հայտարարումից:
Սակայն Հայաստանի ուղին դեպի ՄՄ այդքան էլ հեշտ չէ, ինչպես թվում է, մասնավորապես՝ Ղազախստանի և Բելառուսի պատճառով, որոնք այդքան էլ շահագրգռված չեն միության մեջ նոր անդամ ընդունելու գաղափարով, որը հակամարտում է Ադրբեջանի հետ:
Եվրասիական տնտեսական հանձնաժողովը ստեղծվել է 2011թ. վերջին Ռուսաստանի, Բելառուսի, Ղազախստանի նախագահների որոշմամբ՝ որպես ՄՄ-ի և Միասնական տնտեսական տարածության միասնական մշտական գործող կարգավորող մարմին: Այն ունի կառավարման ազգային մարմնի կարգավիճակ:
Կազմակերպությունը ենթակա չէ երեք երկրների կառավարություններից որևէ մեկին: Հանձնաժողովի որոշումները պարտադիր կերպով պետք է իրականացվեն երեք երկրների տարածքներում: Այն գլխավորում է Վիկտոր Խրիստենկոն:
