ԱՄՆ Հանրապետական կուսակցության ներկայացուցիչները քննադատել են նախագահ Բարաք Օբամային այն պատճառով, որ վերջինս Նելսոն Մանդելայի հուղարկավորությանը սեղմել է Կուբայի առաջնորդ Ռաուլ Կաստրոյի ձեռքը՝ հաղորդում է Los Angeles Times-ը:
Կոնգրեսական Իլեանա Ռոս Լեյթինեն պետքարտուղար Ջոն Քերիից հարցրել է՝ արդյոք Օբամայի որոշումը՝ սեղմել Կաստրոյի՝ «արյան մեջ թաթախված» ձեռքը, նշանակո՞ւմ է ԱՄՆ արտաքին քաղաքականության մեղմացում: Քերին բացասական պատասխան է տվել:
Օբաման ավելի վաղ հայտարարել է, որ նախատեսում է վերանայել Կուբայի հանդեպ արտաքին քաղաքականության որոշ բնագավառներ:
Սենատոր Ջոն Մաքքեյնը հայտարարել է, որ չի հասկանում՝ ինչո՞ւ էր պետք սեղմել մի մարդու ձեռքը, ով ԱՄՆ քաղաքացիներին պահում է բանտում: Նա Օբամայի արարքը համեմատել է Մեծ Բրիտանիայի վարչապետ Նևիլ Չեմբերլենի արարքի հետ, ով 1938թ. սեղմել է Ադոլֆ Հիտլերի ձեռքը:
Հանրապետական կուսակցության մեկ այլ անդամ՝ Մարկո Ռուբիոն, ում ծնողները ծնունդով Կուբայից են, հայտարարել է, որ Օբաման կարող էր ավելի լավ օգտագործել Կաստրոյի հետ հանդիպումը՝ մատնանշելով, որ վերջինիս երկրում բացակայում են ժողովրդավարական ազատությունները, որի համար պայքարել է Հարավաֆրիկյան Հանրապետության նախկին նախագահ Նելսոն Մանդելան:
