Առողջապահության նախարար Արսեն Թորոսյանն այսօր կառավարության նիստի ժամանակ բարձրացրեց հրավառությունների խնդիրը և օրինակ բերեց, որ Նորք-Մարաշում վերջերս ուշ ժամի գրանցվել է հրավառություն, որի ձայնագրությունը կա համացանցներում: Նա ասաց, որ նախկինում նույնիսկ դիմել է ոստիկանություն, և հարցը ընթացք չի ստացել:
Վարչապետ Նիկոլ Փաշինյանը նկատեց, որ Նորք-Մարաշն էլ ոստիկանության բաժանմունք ունի, այնտեղ պետք է դիմեր նախարարը: Նախարարն ասաց, որ օրենք է ընդունվել ամիսներ առաջ, որը պետք է գործի:
ՀՀ ոստիկանապետ Վալերի Օսիպյանն ասաց, որ 2 օր առաջ հայտարարությամբ են հանդես եկել, նորից մեջբերել նախատեսված պատժամիջոցներն ու տուգանքները խախտումների դեպքում: Նա հորդորեց նախարարին փաստերը ներկայացնել ոստիկանություն:
«Հասկանալի է, որ հրավառության առարկան այդպիսին է, որ վայրկյաններ է տևում, սակայն սա խնդիր չպիտի լինի: Անընդհատ ասել, որ հայտնաբերել չի լինում, օրենքը կա, սակայն չի գործում, մի հատ էլ նոր օրենք պիտի ընդունենք, որպեսզի օրենքը գործի և այլ: Չպիտի լինի հրավառություն և վերջ, եթե չի կարողանում համապատասխան ծառայությունն ապահովել, որ հրավառություն չլինի օրենքով սահմանված ժամերի, դա այլ խնդիր է: Այդպես էլ ոչ մի բան չենք կարողանում բացահայտել՝ գողությունները, ընտրակաշառքները, հափշտակությունները, բայց ո՞վ է անելուց հետո կանգնում, սպասում, մինչև գան, բացահայտեն: Դուք լուծեք այդ հարցերը, թե չէ ես կլուծեմ»,-ասաց Նիկոլ Փաշինյանը: