Խորհրդարանի հանրապետական խմբակցությունը մոտենում է այն սահմանին, երբ նա այլևս չի լինի մեծամասնություն, այլ կվերածվի փոքրամասնության: Հետևելով հանրապետականների քայլերին, կարելի է ասել, որ նրանք տակտիկական որոշակի սրբագրումներ են անում իրենց վարքագծում, և դա պայմանավորված է ընթացիկ խնդիրները լուծելու անհրաժեշտությամբ: Ի սկզբանե, երբ ՀՀԿ-ն կողմ քվեարկեց Նիկոլ Փաշինյանի վարչապետ ընտրելուն, հանրապետականները որոշել էին պահել իրենց միասնությունը և շարունակել հանդես գալ որպես խորհրդարանական մեծամասնություն: Նրանք նաև հանդես էին գալիս որպես արտահերթ խորհրդարանական ընտրությունների հակառակորդներ և դեմ էին Ընտրական օրենսգրքի փոփոխություններին: Նրանց ասածն այն էր, որ եթե Փաշինյանը ընտրվել է վարչապետ, իրենք չեն խոչընդոտի նրա կառավարության աշխատանքին: Դրա դիմաց ՀՀԿ-ն ակնկալում էր անձեռնմխելիություն, այսպես ասած՝ ստատուս-քվոյի պահպանում, որովհետև արտահերթ ընտրությունների դեպքում զրկված է լինելու ընտրության արդյունքները թելադրելու հնարավորությունից և, հետևաբար, խորհրդարանում զգալի ներկայություն ունենալու հեռանկարից: Բայց ընթացքում ՀՀԿ-ում հասկացան, որ չի կարող կառավարությունը լինել մի քաղաքական ուժի ձեռքում, իսկ խորհրդարանը մեկ այլ, որ նման աբսուրդի վերացումը ավելի հրատապ է դարձնում արտահերթ ընտրությունների անցկացումը, քան եթե իրենք ինքնակամ հրաժարվեն մեծամասնության կարգավիճակից:
Քաղաքական այս և հարակից խմորումների մասին «Առաջին լրատվական»- ը զրուցեց Գելափ միջազգային կազմակերպության հայաստանյան ներկայացուցչության տնօրեն Արամ Նավասարդյանի և Վերադարձ Հայաստան հիմնադրամի գործադիր տնօրեն Վարդան Մարաշլյանի հետ:
Անդրադառնալով վերջին օրերին Արցախում տեղի ունեցող իրադարձություններին՝ Ա. Նավասարդյանը նշեց, որ ցանկացած պրոցես, որ տեղի է ունենում Հայաստանում կամ Արցախում, սերտ կապակցված են. այլ կարծիք չի կարող լինել, քան այն, որ հայաստանյան ներքաղաքական պրոցեսների անբաժան մաս է մնում Արցախը:
Վարդան Մարաշլյանը հավելեց, որ իր կարծիքով ևս Հայաստանում և Արցախում տեղի ունեցող իրադարձությունները փոխկապակցված են, բայց պետք է նկատի ունենալ, որ Արցախը գտնվում է առաջնային գծում, և որոշակի հարցերի շուրջ պետք է ավելի զգուշավոր լինել: «Այն մշակութային տրանսֆորմացիան, որ մեր ազգն ապրում է Հայաստանում և արդեն նաև Արցախում, շատ կարևոր պրոցես է՝ լավ իմաստով»,- նշեց Մարաշլյանը:
Անդրադառնալով հայաստանյան ներքաղքական իրավիճակին, Նավասրադյանը նշեց, որ նախընտրական ակտիվացում չի նկատվում, այն դեռևս սաղմնային վիճակում է. «Դա կապված է նրա հետ, որ հստակ նշված չէ, թե երբ պետք է տեղի ունենան արտահերթ ընտրությունները. սպասողական վիճակ է… ՀՀԿ-ն բյուրեղանում է, ՀՀԿ-ի համար չի կարող գերխնդիր լինել իշխող կուսակցություն լինելը, նրանք կոնսոլիդացնում են ուժերը, որպեսզի գոնե անցնեն խորհրդարան: Իշխող մեծամասնության ռեալ հնարավորություն ունի երկու կուսակցություն «Ելք»-ը և միգուցե նաև ԲՀԿ-ն:
Վ. Մարաշլյանի խոսքով՝ ՀՀԿ-ն փորձելու է մինչև վերջ պահել մեծամասնությունը, դա կարևորագույն ռեսուրսն է իրենց համար: Նա նաև նշեց, որ անհրաժեշտություն կա, որպեսզի փոխվեն Ընտրական օրենսգիրքը և կուսակցությունների մասին օրենքը:
«ՀՀԿ ղեկավարը չունի լծակներ՝ պատգամավորներին ստիպելու վայր դնել մանդատը, պահանջը օրինական չէ,- ընդգծեց Ա. Նավասարդյանը՝ հավելելով, որ պատգամավորները կարող են չհետևել նրա կոչին»:
Մանրամասն՝ տեսանյութում:
