Կիրակի օրը Արագածոտնի, Արարատի, Արմավիրի, Գեղարքունիքի, Լոռու, Շիրակի, Սյունիքի, Վայոց ձորի մարզերի համայնքներում տեղական ինքնակառավարման մարմինների ընտրություններ էին: Համայնքների մեծ մասում համայնքապետ էին ընտրում, իսկ որոշներում՝ ավագանու անդամներ:
Կենտրոնական ընտրական հանձնաժողովի նախագահ Տիգրան Մուկուչյանն «Առաջին լրատվական»-ի հետ զրույցում ասաց, որ ընտրություններն անցել են խաղաղ, առանց որևէ խախտումի: Ըստ նրա՝ որևէ համայնքից որևէ դիմում, բողոք, ահազանգ չի ներկայացվել ընտրատարածքային ընտրական հանձնաժողովներ: Քվեարկության օրը սահմանված կարգով բացվել են բոլոր տեղամասերը, գործընթացին հետևել են վստահված անձինք: Իսկ այսօր մինչև ժամը 18:00-ն, երբ ավարտվում է վերահաշվարկի և արդյունքներն անվավեր ճանաչելու դիմումների ընդունման վերջնաժամկետը, որևէ դիմում չի ներկայացվել ԿԸՀ: Մուկուչյանի խոսքով՝ ուսումնասիրվել են նաև տեղամասային ընտրական հանձնաժողովների գրանցամատյանները, այնտեղ ևս որևէ գրառում չի արվել:
11 համայնքներից, որտեղ համայնքապետի ընտրություն էր, 1-ում արտահերթ ընտրություն էր և նոր գյուղապետ է ընտրվել, 8-ում վերընտրվել են գործող համայնքապետերը, իսկ երկուսում՝ Արարատի մարզի Այգավան և Սյունիքի մարզի Ճակատեն համայնքների գործող ղեկավարները պարտվել են, և նոր ղեկավարներ են ընտրվել: Ընդ որում Ճակատենի պարտված համայնքապետը ՀՀԿ-ական է եղել:
