Ոստիկանների գործադուլի ֆոնին արգենտինական մի քանի նահանգների առևտրի կետերում տեղի են ունեցել զանգվածային կողոպուտի նոր դեպքեր: Ավելի քան 40 մարդ վնասվածք է ստացել: Այս մասին հայտնում է RIA Novosti-ն՝ հղում անելով բժիշկների տվյալներին:
Մեկ շաբաթ առաջ Կորդովա նահանգի ոստիկանները գործադուլ էին հայտարարել: Նրանք դժգոհում էին իրենց աշխատավարձերից ու սոցիալական նպաստներից:
Առիթից օգտվելով՝ մի քանի տասնյակ հանցագործներ սկսել էին թալանել սուպերմարկետներն ու փոքր կրպակները: Ընդհանուր առմամբ ավելի քան 1000 առևտրի կետ է թալանվել: Զոհվել է առնվազն 2 մարդ, վիրավորվել շուրջ 60-ը: Հասցված ընդհանուր վնասը գերազանցել է 50 մլն դոլարը: Ձերբակալվել է մոտ 100 մարդ:
Գործադուլից մեկ օր անց ոստիկանները վերադարձել էին աշխատանքի: Շաբաթ և կիրակի օրերին հայտնի էր դարձել, որ արգենտինական շատ քաղաքներում ոստիկանները հետևել են Կորդովայի գործընկերների օրինակին՝ հայտարարելով բողոքի ակցիաների անցկացման մասին:
Կենտրոնական իշխանությունները հայտարարում են, որ քաղաքացիների անվտանգության ապահովման հարցերը, ինչպես նաև ոստիկանության ծառայողների սոցիալական ապահովությունը տեղի իշխանությունների բացառիկ իրավասությունն է:
