Վանաձոր համայնքի ավագանու 7 անդամներ դեռևս նոյեմբերին դիմել էին քաղաքապետին` բյուջեից միջոցներ հատկացնելու` քաղաքի ամանորյա տոնածառը զարդարելու համար: Ներկայացրել էին նախագիծ-նախահաշիվ և եղևնու ձևավորման էսքիզներ` առաջարկելով հրատապության կարգով բյուջեում կատարել համապատասխան փոփոխություն և նշված աշխատանքների համար նախատեսել 5 մլն դրամ: Ավագանու վերջին նիստում նախագիծը դրվեց քննարկման և միաձայն հաստատվեց ավագանու անդամների կողմից:
Նշված 5 մլն դրամն ապահովվում է համայնքի 2013թ. բյուջեի ծախսային մասում փոփոխություններ կատարելու հաշվին: Այսպես` բյուջեով արդեն հաստատված` «օրենսդիր և գործադիր մարմինների պետական կառավարման» և «աշխատակազմի պահպանման ծախսերի» համար նախատեսված 4 մլն 466 հազարական դրամներից վերցվում է այս տողերից յուրաքանչյուրով «կապի ծառայությունների» համար հաշվարկված 2-ական միլիոն դրամ: 534 հազար դրամ էլ համայնքի պահուստային ֆոնդից է հատկացվում:
Ինչպես ավագանու անդամներն էին նշել քաղաքապետին հասցեագրած իրենց գրավոր դիմումում, տարիներ ի վեր ամանորյա միջոցառումների ժամանակ Վանաձորի Հայքի հրապարակի կենտրոնական եղևնու զարդարանքի համար ոչ բավարար ֆինանսական միջոցներ են հատկացվել, ինչի պատճառով «եղևին պատշաճ չի ձևավորվել` առաջացնելով ազգաբնակչության դժգոհությունը»:
«Ճիշտն ասած, այս հարցը վերջին մի քանի տարիներին անընդհատ հասունացել է Վանաձորի ազգաբնակչության շրջանում, և մենք մի քանի նիստերի պայմաններում քննարկեցինք և եկանք հետևյալ եզրակացության, որ Վանաձորի Նոր տարվա տոնածառը պետք է շատ գեղեցիկ լինի, և հաշվարկվել է դրա համար գումար»,- ավագանու նիստի ժամանակ ասաց քաղաքապետ Սամվել Դարբինյանը:
Այսպիսով, ըստ հաստատված նախագիծ-նախահաշվարկի, այս տարի Վանաձորի Հայքի հրապարակի ամանորյա տոնածառը զարդարված է լինելու փոփոխվող լուսային և գունային 7 ռեժիմներով, քառակողմ եռագույն լուսարձակ լամպերով, 4-5 սմ տրամագծով գնդաձև խաղալիքների շղթայով և ունենալու է 1 մետր բարձրությամբ գագաթ:
