Աջափնյակ և Դավթաշեն վարչական շրջանների ընդհանուր իրավասության դատարանում Դավիթ Բալայանի նախագահությամբ սկսվում է Տիգրան Մնոյանի գործի դատավարությունը:
Ըստ մեղադրանքի՝ 29-ամյա Տիգրան Մնոյանը 2013 թվականի փետրվարի 23-ին ուրիշի գույքի գաղտնի հափշտակություն կատարելու դիտավորությամբ լինգի գործադրմամբ բացել է Դ. Ս.-ին պատկանող ավտոտնակի դռները, ապօրինի մուտք է գործել ու հափշտակել 1991 թվականի արտադրության, 1 միլիոն 450 հազար դրամ արժողության ավտոմեքենան:
Մերօրյա «Դետոչկինը» ուղևորվել է դեպի Արագածոտնի մարզ: Բայց ճանապարհին նա մեքենայում հայտնաբերել է 14 հազար դոլար և բջջային հեռախոս:
Ըստ մեղադրանքի՝ հենց դրանք էլ հափշտակել է Տիգրան Մնոյանը ու դիմել է փախուստի՝ մեքենան թողնելով Հարթավան գյուղում:
Տիգրան Մնոյանին մեղադրանք է առաջադրվել գողության համար՝ ՀՀ քրեական օրենսգրքի 177 հոդվածի 3-րդ մասի 1-ին կետով:
Մնոյանի խափանման միջոցը կալանավորումն է:
