ՀՀ քննչական կոմիտեի նախագահի տեղակալ Արթուր Ղամբարյանը վստահեցնում է՝ իրենց համակարգում կաշառքի դրսևորումների առնչությամբ հարուցվում են քննչական գործեր: «Երեկ հայտարարվեց, որ ութ քննիչ հետապնդման է ենթարկվել: Երբ կոռուպցիոն դեպքեր լինում են, բացահայտվում են»,- կառավարության նիստից առաջ լրագրողների հետ զրույցում ասաց Արթուր Ղամբարյանը:
Անդրադառնալով հարցին, թե ինչ բացահայտումներ կան ցույցերի ժամանակ անհայտ անձանց կողմից ցուցարարների նկատմամբ բռնություն գործադրելու դեպքերի առնչությամբ՝ նա հորդորեց դիմել Քննչական կոմիտեի մամուլի պատասխանատուին, քանի որ ինքը չի տիրապետում հարցին, որն իր համակարգման ոլորտում չէ:
Ճշտող հարցին, թե «այդ գործերով բարձրաստիճան պաշտոնյաներ, նրանց մերձակա շրջապատի մարդիկ կհայտնվե՞ն մեղադրյալ աթոռին» ի պատասխան՝ Արթուր Ղամբարյանն ասաց. «Եթե հիմքեր լինեն, ապա այո, քանի որ օրենքով այդպես է»:
Ինչ վերաբերում է նոր քաղաքական իրավիճակում իր պաշտոնից հրաժարվելու հնարավորությանը, ապա Արթուր Ղամբարյանն ասաց՝ դրա համար հիմքեր լինելու դեպքում պատրաստ կլինի, իսկ այժմ շարունակում է աշխատել:
