«Ժողովուրդ» օրաթերթի գլխավոր խմբագիր Թագուհի Թովմասյանն այսօրվա խմբագրականում գրում է.
Կիևում ԵԱՀԿ նախարարների խորհրդի նիստի շրջանակներում Մինսկի խմբի համանախագահ երկրների պատվիրակությունների ղեկավարները՝ ՌԴ ԱԳ նախարար Սերգեյ Լավրովը, Ֆրանսիայի` եվրոպական հարցերով նախարար Տյերի Ռեպենտինը, ԱՄՆ պետքարտուղարի` Եվրոպայի ու Եվրասիայի հարցերով տեղակալ Վիկտորյա Նուլանդը, ողջունել են Իլհամ Ալիևի և Սերժ Սարգսյանի միջև երկամյա դադարից հետո բանակցային գործընթացի վերսկսումը և հույս հայտնել, որ գալիք հանդիպումները կնպաստեն խաղաղ գործընթացի առաջխաղացմանը:
Հայաստանի և Ադրբեջանի արտգործնախարարների միջև պայմանավորվածություն է ձեռք բերվել կրկին հանդիպել 2014թ. սկզբին՝ նախապատրաստելու երկու երկրների նախագահների հաջորդ հանդիպումը: Իսկ մինչ այդ ԵԱՀԿ-ի արտգործնախարարների խորհրդի նիստում Ղարաբաղի հարցով բավականին ուշագրավ հայտարարություններ են արել Ռուսաստանի և Ադրբեջանի ԱԳ նախարարները: Մասնավորապես, Ադրբեջանի ԱԳՆ ղեկավար Էլմար Մամեդյարովն ասել է.
«Ադրբեջանը հուսով է, որ հակամարտությունների լուծման և սպառազինությունների վերահսկման ուղղությամբ ԵԱՀԿ-ի ջանքերը մոտ ապագայում հաջողություն կունենան»:
Սպառազինությունների թույլատրելի բոլոր նորմերը խախտող և դա ֆետիշացնող երկրի արտգործնախարարի այս նյարդային հայտարարությունը, բնականաբար, կապված է Հայաստանում ռուսական ռազմաբազայի ընդարձակման և հայկական զինուժի՝ նոր սպառազինություններով համալրման հետ: Ադրբեջանական կողմի հայտարարություններում նկատելի էին նաև շեշտադրումների փոփոխություններ՝ կարգավորման փաստաթղթի շուրջ:
Խմբագրականն ամբողջությամբ՝ կարդացեք «Ժողովուրդ» օրաթերթի այսօրվա համարում:
