Նոր Հայաստան, նոր իրողություններ, կարծես թե կոռուպցիայի դեմ պայքարի լավագույն հնարավորություններն ստեղծված են և ոչինչ չի խանգարում արդյունավետ կերպով պատասխանատվության ենթարկել նրանց, ովքեր երկիրը հասցրել են այս վիճակին և համերաշխության մթնոլորտ ապահովել երկրում: «Առաջին լրատվական»- ի հետ զրույցում ՀՔԱ Վանաձորի գրասենյակի ղեկավար Արթուր Սաքունցն, անդրադառնալով այս դիտարկմանը, նշեց. «Քաղաքական դաշտը, ըստ էության, ոչնչացված էր՝ բացառությամբ մի քանի կղզյակների, որոնց հիման վրա էլ այս ամբողջ համաժողովրդական շարժումը կարողացավ իրացվել:
Նախկինում ովքեր փորձում էին կարերիայի առաջխաղացում ունենալ, պետք է անպայման անցնեին Մելիք-Ադամյանով: Այդ հրամայականը դաշտում շատ քիչ մարդ էր թողել: Ի հակակշիռ դրան, տեսանք, որ Հայաստանի ժողովուրդը հակված է չհաշտվելու և փոփոխությունների պահանջ կա: Արդեն գնդակը գտնվում է նոր կառավարության դաշտում:
Իսկ նոր կառավարությունն ի՞նչ լծակներ ունի՝ բացի անչափ լեգիտիմությունից ու մանդատից: Մանդատի իրականացման համար պետք է ելնենք այն սկզբունքից, որ վենդետա չի լինելու, համերաշխություն պետք է լինի, և երկրորդ՝ օրենքի առջև հավասար պատասխանատվության սկզբունքից»:
Ա. Սաքունցն ընդգծեց, որ կոռուպցիայի դեմ պայքարը կարող է լինել օրինական ճանապարհով. «Օրենսդրական փոփոխություններ են անհրաժեշտ, և երկրորդ՝ պառլամենտական համակարգի և բիզնեսի անհամատեղելիության սկզբունքը պետք է իրականացվի: Բայց այս սկզբունքների իրականացման համար անհրաժեշտ իրավական երաշխիքներն ստեղծելը կախված է խորհրդարանից»:
Անդրադառնալով դիտարկմանը, որ հակահեղափոխականները սպասում են Փաշինյանի ձախողմանը, Սաքունցը նշեց, որ չի կարծում, թե վարչապետ Նիկոլ Փաշինյանը կձախողվի:
Նա նաև ընդգծեց, կոռուպցիայի դեմ պայքարը պետք է պահել օրակարգում, այն առաջնային խնդիր է:
Սաքունցն ընդգծեց, որ հեղափոխության տրամաբանական շարունակությունը պետք է ապահովել, և հավելեց, որ խնդիր ունենք օրենսդրական դաշտը կարգավորելու և իրավապահ համակարգում կադրային փոփոխությունների:
Սաքունցի կարծիքով՝ նախարարություններում պետք է աուդիտ անցակացվի, որպեսզի պարզվի, թե ինչ է տեղի ունեցել. «Ահռելի, խայտառակ յուրացումներ են եղել»:
Հարցազրույցն ամբողջությամբ՝ տեսանյութում:
