Պոմպեոն դաշնակիցների հետ բանակցություններ կսկսի՝ Իրանի վրա ճնշումն ուժեղացնելու հետ կապված

ԱՄՆ պետքարտուղար Մայք Պոմպեոն բանակցություններ կսկսի Եվրոպայի, Մերձավոր Արեւելքի եւ Ասիայի դաշնակիցների հետ՝ Իրանի վրա ճնշում գործադրելու հարցում նրանց համոզելու համար: Այս մասին հայտարարել է ԱՄՆ Պետքարտուղարության ներկայացուցիչ Բրայան Հուկը, փոխանցում է Reuters-ը։

Սակայն հայտնի չէ՝ արդյո՞ք դաշնակիցները եւ առաջին հերթին Իրանը կհամաձայնեն լայնամասշտաբ բանակցությունները վերսկսել իրանական միջուկային համաձայնագրից ԱՄՆ-ի դուրս գալուց հետո: Վաշինգտոնը հույս ունի Թեհրանին բանակցությունների սեղանի շուրջ նստեցնել պատժամիջոցների վերականգնման եւ նորերի սահմանման միջոցով:

Հուկն ասել է, որ Մեծ Բրիտանիայի, Ֆրանսիայի եւ Գերմանիայի, ինչպես նաեւ Ճապոնիայի, Իրաքի եւ Իսրայելի հետ հաջորդ քայլերի մասին բանակցությունները սկսվել են գործարքից դուրս գալու մասին ԱՄՆ նախագահ Դոնալդ Թրամփի հայտարարությունից անմիջապես հետո:

«Իրանցիների հետ բանակցելուց առաջ մի քանի փուլ է լինելու»,- նշել է Հուկը՝ հավելելով, որ բանակցությունները կենտրոնացած են այն հարցի շուրջ, թե Իրանի վրա ճնշումն «ինչպես ուժեղացնեն, որ այն կառուցողական դառնա եւ նստի բանակցությունների սեղանի շուրջ»:

Թրամփի որոշումը բացում է Թեհրանի հետ ԱՄՆ-ի մեծ առճակատման դռները եւ լարվածություն է ստեղծում Ամերիկայի մերձավորարեւելյան դաշնակիցների հարաբերություններում, ասում են գործող եւ նախկին պաշտոնյաները։