Պարտադիր կուտակային կենսաթոշակների վերաբերյալ նախագծի քննարկումն ԱԺ-ում իրականացվում է այն պահին, երբ դրսում հազարավոր քաղաքացիներ բողոքի ակցիա են անցկացնում վերոնշյալ նախագծի դեմ՝ այսօր ԱԺ նիստում այս մասին նշեց ԱԺ ՀՅԴ խմբակցության պատգամավոր Արծվիկ Մինասյանը:
Նրա խոսքով՝ ինքը շատ կցանկանար, որ խորհրդարանում հնչած խոսքերը, հատկապես՝ քաղաքական մեծամասնության, լինեին ավելի իմաստալի, նպատակային ու քաղաքացիներին ճշմարտությունը փոխանցող:
Անդրադառնալով ԱԺ նախագահ Հովիկ Աբրահամյանի կոռեկտության կոչին՝ Մինասյանը նշեց, որ կցանկանար դրան առաջին հերթին հետևեն քաղաքական մեծամասնության առանձին պատգամավորներ, ովքեր տեղի-անտեղի վիրավորում են թե ընդդիմադիր քաղաքական ուժին և թե ընդդիմախոս քաղաքացիներին, որովհետև այդ ձևով չէ, որ հնարավոր է իրական քննարկում կազմակերպել:
Խնդրո առարկայի մասին խոսելով՝ Մինասյանը նշեց, որ «ռեֆորմ» բառը սարսափելի չարաշահում են. երբ իրենք խոսում են ռեֆորմի բացասական դրսևորումների մասին, ամենևին խոսքն ամբողջ ռեֆորմի մասին չէ, խոսքը ռեֆորմի պարտադիր կուտակային բաղադրիչի մասին է:
«Երբ որոշ ժամանակ առաջ Վահան Հովհաննիսյանը օրինակ էր բերում, այդ օրինակը հենց այս դեպքի համար է. մսավաճառին երբ ասում ես՝ 5 կգ փափուկ միս եմ ուզում, 2 կգ փափուկ է տալիս, 3 կգ-ի դիմաց էլ ոսկոր է մտցնում, ասում` առ միսդ, գնա: Սա նույն բանն է»,- նշեց Մինասյանը` հավելելով, որ չի կարելի ռեֆորմ բառը չարաշահել:
Պատգամավորը համոզված է՝ յուրաքանչյուր բարեփոխում իր ժամանակն ունի, և այս ռեֆորմը չէր կարող իրականություն դառնալ՝ ինչպես 1990-ական թվականներին, այնպես էլ հիմա:
Ըստ ՀՅԴ անդամի՝ երկրները, որոնք գնացել են ռեֆորմի ճանապարհով, հաշվի են առել երկրի սոցիալ-տնտեսական վիճակը: Բայց մենք այսօր, երբ ունենք 35%-անոց աղքատություն, գործազուրկների 300.000-անոց բանակ, մեկ միլիոն երկու հարյուր հազար զբաղվածների մեջ ընդամենը սոցիալական վճար կատարող 400.000 անձ, այսպիսի բեռ չենք կարող դնել մեր քաղաքացիների ուսերին:
«Հասկանո՞ւմ եք դա, թե՞ չէ, այս մարդկանց մենք ասում ենք` դուք Հայաստանում այլևս անելիք չունեք, հեռացեք Հայաստանից: Եթե ցանկություն կա թոշակային ֆոնդի վճարողների թիվն ավելացնելու, ապա պետք է աշխատատեղեր ստեղծել, տնտեսության մրցունակությունը բարձրացնել, ՀՆԱ-ի ցուցանիշը մեկ անձի հաշվով ավելացնել, աշխատավարձի քաղաքականություն իրականացնել, այլ ոչ թե գումարները հավաքել քաղաքացիներից և տալ մասնավորին»,- ասաց նա:
Մինասյանը հիշեցրեց՝ «Արմավիան» պետք է իրականացներ պետական տուրքերի ու հարկերի փոխանցումը պետբյուջե, տվեցին այդ իրավասությունը «Արմավիային», և արդյունքում՝ 18 միլիարդ դոլարի կորուստ պետբյուջեում: Պատգամավորը հետաքրքրվեց՝ ո՞վ է երաշխավորում, որ վաղը կենսաթոշակային ֆոնդերի գումարները չեն արժանանա նույն ճակատագրին, ուստի այս պայմաններում նման քայլ անելը նշանակում է քաղաքացիների եկամուտների նկատմամբ ոտնձգություն:
Մինասյանն ընդգծեց՝ այս նախագիծը դիմության ու ընդդիմության պայքար չէ, այլ Հայաստանի քաղաքացու տարրական իրավունքների շուրջ բանավեճ: Նա խնդրեց, որպեսզի քվեարկության ժամանակ ևս մեկ անգամ իրենք իրենց հարցնեն`արդյոք սերունդների առջև ազնի՞վ են լինելու:
