Այն, որ իշխանությունները ԱԺ ՀՀԿ-ական պատգամավոր Սամվել Ալեքսանյանի համար ստեղծել են բոլոր պայմանները՝ աճելու և բարգավաճելու համար, կասկածից վեր է: Միայն վերջին իրադարձությունները՝ կապված Փակ շուկայի հետ, ցրեցին բոլոր կասկածները: Ավելին՝ դրանից հետո նոր տարածք հատկացվեց Ալեքսանյանին՝ նոր «Սիթի» բացելու համար: Սնանկացան ու փակվեցին «Սթար» սուպերմարկետները, փոխարենը Ալեքսանյանը սկսեց բացել նոր «Երևան սիթի»-ներ:
Ամրապնդելով դիրքերը սուպերմարկետների բիզնեսում՝ Սամվել Ալեքսանյանը որոշել է նաև ամրապնդել դիրքերը մեկ այլ բիզնես-դաշտում: Խոսքը բջջային հեռախոսների ներկրման մասին է: Այն, որ Ալեքսանյանը ներգրավված է այդ բիզնեսում, փաստել են նաև արտերկրյա լրատվամիջոցները: Ալեքսանյանը Ռոբերտ Քոչարյանի ավագ որդու՝ Սեդրակ Քոչարյանի բիզնես-գործընկերն է Հայաստան բջջային հեռախոսներ ներկրելու գործում: Իսկ ավելի ուշ, երբ կրտսեր Քոչարյանի հետաքրքրությունները նվազեցին հեռախոսների ներկրման հանդեպ, Ալեքսանյանն ավելի ակտիվացավ:
Այժմ նա փորձում է ամբողջությամբ մենաշնորհել դաշտը՝ արգելելով քաղաքացիներին իրենց հետ դրսից հեռախոս բերել: Մասնավորապես, վերջին շրջանում հստակ հրահանգ է իջեցվել, և մաքսային անցակետերում աշխատողներին արգելվել է թույլատրել «անցկացնել» նույնիսկ մեկ հեռախոս (տուփով), որը քաղաքացիները իրենց հետ բերում են արտերկրից:
Մաքսային անցակետում աշխատողներց ոմանք մեզ պատմեցին, որ ուժեղացված հսկողություն է սահմանվել հատկապես հեռախոսների ներկրման վրա, և դա բացատրեցին հենց վերը նշված հանգամանքով՝ «խփում է Լֆիկի բիզնեսին»: Ստացվում է, որ մարդիկ անգամ իրենց բարեկամին չեն կարող նվեր բերել. եթե հեռախոսը տուփով է, ապա այն առգրավվում է՝ ասացին նրանք:
Նշենք, որ մեր ունեցած տեղեկություններով՝ մաքսային անցակետերում աշխատող մի քանի անձ արդեն պատասխանատվության են ենթարկվել հեռախոսների անցկացումը թույլ տալու համար: Ճիշտ է, դա օրենքի պահանջ է, և ոչ ոք չի խրախուսում մաքսանենգությունը, բայց երբ այն իրականացվում է մենաշնորհը խրախուսելու հատուկ նպատակով՝ Ալեքսանյանի և Քոչարյանի բիզնեսը ծաղկեցնելու համար, արդեն զավեշտալի է դառնում:
