Աֆղանստանը ԱՄՆ-ին մեղադրել է, որ նա ուշացնում է վառելիքի և սարքավորումների մատակարարումները իրենց երկրի անվտանգության ուժերին, որպեսզի ստիպեն Աֆղանստանի իշխանություններին՝ արագացնել անվտանգության հարցով երկկողմանի համաձայնագրի ստորագրումը՝ հաղորդում է Russia Today-ը:
Նախագահի աշխատակազմի հայտարարության համաձայն՝ ուշացումները, որոնք անվտանգության ուժերին ստիպել են դադարեցնել գործողությունները, տեղի են ունեցել «երկու կամ երեք անգամ»: Այս հայտարարությունը հաջորդել է Աֆղանստանի ազգային անվտանգության խորհրդի նիստին, որին մասնակցել է նաև Քարզայը:
Միևնույն ժամանակ, Աֆղանստանում ՆԱՏՕ-ի կոնտինգենտի ներկայացուցիչը հերքել է ամերիկյան մատակակարումների դադարեցման կամ ուշացման մասին հաղորդագրությունը: Նա նշել է, որ վառելիքը մատակարարվում է նշանակված ժամկետներում:
Ավելի վաղ հայտնի էր դարձել, որ Աֆղանստանի նախագահ Համիդ Քարզայը հրաժարվել է ԱՄՆ-ի հետ ստորագրել անվտանգության երկկողմանի համաձայնագիր նախքան ապրիլին կայանալիք նախագահական ընտրությունները:
