Ռուսաստանի նախագահ Վլադիմիր Պուտինի՝ Հայաստան կատարած այցը ոչ թե ինչ-որ գործընթացի սկիզբ է լինելու, այլ միայն հաստատելու է, որ այդ երկիրը կարողանում է շանտաժի լեզվով խնդիրներ լուծել: Այսօր տեղի ունեցած մամուլի ասուլիսի ժամանակ այս մասին ասաց «Ժառանգություն» կուսակցության փոխնախագահ Արմեն Մարտիրոսյանը՝ հավելելով, որ սա միայն մեր իշխանությունների մեղքն է:
«Չգիտեմ՝ երբ ՀՀ նախագահն է գնում Ռուսաստան, արդյոք նրան այսքան մեծ շուքո՞վ են դիմավորում, ինչպես այսօր՝ Վլադիմիր Պուտինին»,- զարմանք հայտնեց նա:
Անդրադառնալով օրեր առաջ տեղի ունեցած վիլնյուսյան գագաթնաժողովին՝ քաղաքական գործիչը նկատեց, որ այնտեղ Հայաստանը ԵՄ-ի հետ Ասոցացման պայմանագիր կնքելու լավ հնարավորություն կորցրեց:
«Այն, ինչ կատարվեց Վիլնյուսում, ուղղակի խայտառակություն էր: Գագաթնաժողովը փաստեց, որ Հայաստանը վստահելի գործընկեր չէ: Ցավն այն է, որ Վիլնյուսում Հայաստանի անունն այդպես էլ չշոշափվեց, մենք սուբյեկտից վերածվեցինք օբյեկտի: Գագաթնաժողովը մեկ անգամ ևս ցույց տվեց, որ աշխարհը գնում է իրավահավասար հարաբերությունների, այլ ոչ՝ տիրոջ և ծառայի: Փաստորեն, բոլոր երկրները պետք է հարաբերվեն Հայաստանի այլ «տիրոջ»՝ Ռուսաստանի հետ: Այսկերպ ՀՀ իշխանությունները հերթական անգամ ոտնահարում են Սահմանադրությունը, որտեղ գրված է՝ վերպետական մարմին չի կարող գոյություն ունենալ: Մաքսային միությունը, սակայն, հենց այդպիսի մարմին է»,- ասաց Արմեն Մարտիրոսյանը:
«Ժառանգություն» կուսակցության փոխնախագահի խոսքով՝ Հայաստանին բացահայտ խաբում են, թե ՄՄ անդամ դառնալով՝ նա լուծում է ազգային անվտանգության հարցը: «Գյումրիում տեղակայված ռուսական 102-րդ բազայի զենքը պատկանում է միայն Ռուսաստանին: Բայց անգամ ՀԱՊԿ շրջանակներում Ռուսաստանը չի կարողանում սաստել Հայաստանի ուղղությամբ անընդմեջ դիվերսիաներ իրականացնող Ադրբեջանին, ավելին՝ այդ երկրին 2 մլրդ դոլարի զենք է վաճառում»,- ասաց նա:
Արմեն Մարտիրոսյանի համոզմամբ՝ ոչ լեգիտիմ, ժողովրդի ձայնը չստացած իշխանություններն ի վիճակի չեն ազգանպաստ քաղաքականություն վարել, և ստեղծված իրավիճակից չկա այլ ելք, քան իշխանափոխությունն ու արմատական բարեփոխումները:
«Ոչ ոք չի ասում, որ Ռուսաստանի հետ չպետք է հարաբերություններ ունենալ: Պարզապես ակնհայտ է, որ Հայաստանի համար լավագույն ընտրությունը կլիներ Ասոցացման պայմանագիրը: Մի՞թե հնարավոր չէր տնտեսության մեջ մի քանի տարի եվրաստանդարտների կիրառմամբ հասնել որակյալ արտադրանքի՝ եվրոպական մեծ շուկա արտահանման: Իսկ ՄՄ անդամությամբ Հայաստանը զրկվում է դիվերսիֆիկացիայից, կախման մեջ է հայտնվում Ռուսաստանից»,- ասաց քաղաքական գործիչը:
Ամփոփելով՝ «Ժառանգություն» կուսակցության փոխնախագահը նշեց, որ ԵՄ-ի հետ Հայաստանի հետագա հարաբերություններում դրական միտում չի տեսնում. «Եվրոպան այսուհետ մեզ կվերաբերի այնքանով՝ որքանով: Այն հարվածները, որ կստանանք ԵՄ-ից, խիստ առարկայական կլինեն՝ ներդրումների կրճատում, Հայաստանի դեմ բանաձևերի ընդունում, եվրոպական հարթակում Ադրբեջանի դիրքորոշումների առաջմղում և այլն»:
