Հայոց ցեղապանության 103-րդ տարելիցի կապակցությամբ Մադրիդում այս օրերին տեղի են ունենում մի շարք միջոցառումներ:
Ինչպես տեղեկացրին Իսպանիայում ՀՀ դեսպանությունից, ապրիլի 22-ին Իսպանիայի կաթոլիկ եկեղեցու կողմից մատուցվեց պատարագ՝ նվիրված Հայոց ցեղասպանության զոհերի հիշատակին: Պատարագին իրենց մասնակցությունը բերեցին նաև Մադրիդում Հայ Առաքելական Եկեղեցու ներկայացուցիչ Շնորհք աբեղա Սարգսյանը և Մադրիդում գործող «Վերածնունդ» եկեղեցական երգչախումը, որը պատարագի ընթացում, կատարեց մի շարք հայկական շարականներ՝ հիացնելով և մեծ հետաքրքրություն առաջացնելով իսպանացի մասնակիցների մոտ:
Ապրիլի 23-ին տեղի ունեցավ նույն թեմայով դասախոսություն-քննարկում: Ողջույնի խոսքով հանդես եկավ ԻԹ-ում ՀՀ արտակարգ և լիազոր դեսպան Ավետ Ադոնցը, ով կարևորեց նման միջոցառումների անցկացումը՝ մարդկության դեմ կատարված հանցագործությունների ճանաչման և դատապարտման համատեքստում, շեշտեց նաև նման միջոցառումների տեղեկատվական կարևոր գործառույթը:
Ապրիլի 22-24-ը Մադրիդում այցելուների համար բաց է «Հայոց ցեղասպանությունն` արտասահմանյան մամուլի առաջին էջերին» ֆոտոցուցադրությունը, որի նյութերը տրամադրել է Հայոց ցեղասպանության թանգարան-ինստիտուտը:
Բոլոր միջոցառումներին մասնակցում են մեծ թվով իսպանացիներ, թեմայով հետաքրքրվող հետազոտողներ, համալսարանական և ԶԼՄ շրջանակների ներկայացուցիչներ:
Միջոցառումներին իր մասնակցությունը բերեց նաև այս տարի Հայաստանը «Եվրատեսիլ» համաեվրոպական երգի մրցույթում ներկայացնող Սևակ Խանաղյանը, ով այս օրերին, իր համերգային շրջագայության շրջանակներում, գտնվում էր Մադրիդում:
Միջոցառումները կազմակերպվել են Մադրիդի Հայ Տուն մշակութային միության, Մադրիդում Հայ Առաքելական Եկեղեցու ներկայացուցչության և ՀՀ դեսպանության համագործակցությամբ:
