«Քաղաքական փոփոխությունները երկրներում երկու տարբերակով են լինում: Առաջին՝ ընտրությունների միջոցով, սակայն մենք բոլորս գիտենք, որ Հայաստանում գոյություն չունի ընտրությունների մշակույթ, ժողովրդին արգելափակել են այդ իրավունքից, այդ տարբերակը չի գործում: Երկրորդ տարբերակն էլ, որ պատմությունը մեզ հուշում է՝ հեղաշրջումների միջոցով է: Այս տարբերակն էլ մենք համարում ենք ոչ ճիշտ, որովհետև մենք այն երկիրը չենք, որ երկարաժակետ ցնցումների համար բավարար ռեսուրս ունենանք»,- այսօր լրագրողների հետ հանդիպման ընթացքում ասաց «Նախախորհրդարանի» քարտուղարության անդամ Ժիրայր Սեֆիլյանը:
Նա նշեց, որ գոյություն ունի երրորդ ուղի, ինչի մասին իրենք արդեն մի քանի ամիս է՝ խոսում են․ «Մենք չենք սպասելու մինչև հաջորդ ընտրություններ: Մեր հույսը քաղաքացիական ձևավորվող դաշտն է, որը, իր հերթին, առաջինը քաղաքական է:
Այսօր շատ է խոսվում քաղաքացիական դաշտի փոշիացման մասին: Ես այդ կարծիքին չեմ: Այդ խմբերի գործունեությունը ես ավելի շատ նմանեցնում եմ վտակների, որոնք ի վերջո դառնալու են մի գետ, որը սրբելու է և տանի այս համակարգը: Մենք կարևորում ենք նաև քաղաքական սերնդափոխության համակարգը՝ խոսում ենք որակական սերնդափոխության մասին և ոչ տարիքային:
Անցած 20-25 տարիների ընթացքում քաղաքական խավի մեջ գերիշխում էր ստրկամտությունը և, ի տարբերություն այդ սերնդի, մեր պատկերացրած քաղաքական նոր խավը պետք է ունենա հայաստանակենտրոն գաղափարի գերիշխանություն, և պետք է զերծ լինի այն բարդույթներից, թե մենք հայերս չենք կարող լուրջ և հզոր պետություն ստեղծել»:
Նա ընդգծեց, որ մենք կարող ենք դառնալ ոչ միայն տարածաշրջանային, այլև համաշխարհային իմաստով մատնացույց արվող հզոր երկիր:
«Որպես անելիք կուզեմ շեշտել մեր առաջիկա անելիքների մասին: Մեկն այն է, որ որոշել ենք դեկտեմբերի 14-ից ամենշաբաթյա երթերի սկիզբ դնել, երթերն իրենց բնույթով կլինեն «քայլող միտինգների» տրամաբանության շրջանակներում: Երթերի խորագիրն է՝ միացեք դիմադրությանը, ազատագրենք Հայաստանը»:
