Սարգսյան-Ալիև վերջին հանդիպումը որևէ արդյունք չտվեց և ոչ էլ կարող էր տալ, քանի որ կողմերի դիրքորոշումները խիստ տարբեր են: Այսօր կայացած մամուլի ասուլիսի ժամանակ այս մասին ասաց «Մոդուս վիվենդի» կենտրոնի ղեկավար Արա Պապյանը՝ հավելելով, որ Ադրբեջանի կողմից զենքի անընդհատ կուտակումն ի վերջո հանգեցնելու է պատերազմի:
«Միաժամանակ, պատերազմի հավանականությունը փոքր եմ գնահատում: Ադրբեջանի քայլերը նման բան չեն հուշում: Այդ երկիրն ուզում է գեղեցիկ պատրվակներ փնտրել՝ սեփական ժողովրդի մոտ արդարանալու, թե ինչու պատերազմ չի սկսում: Իրենց նպատակները, կարծում եմ, հեռահար են՝ Հայաստանին տնտեսապես քայքայել:
Ինչ վերաբերում է ԼՂ հարցը մադրիդյան սկզբունքերով կարգավորելուն, ապա դա ուղղակի անհնար է: Հայաստանը պետք է հեռանա այդ սկզբունքերից: Ադրբեջանն առ այսօր օկուպացված է պահում Հայաստանի մի մասը և «հող՝ խաղաղության դիմաց» սկզբունքը կարող է գործել միայն Ադրբեջանի՝ Հայաստանից բռնազավթած հողերի վերադարձման համատեքստում»,- ասաց նա:
Արա Պապյանի խոսքով՝ եթե Արցախում մի օր պատերազմ սկսվի, ադրբեջանցիների հետ դեմառդեմ միայն հայերն են մնալու: «Ռուսաստանը բացահայտ ասում է, որ նման զարգացումների դեպքում ինքը չի օգնելու Հայաստանին: Մենք պետք է օգտագործենք այն գործոնները, որոնք Ադրբեջանը չի կարող գործածել մեր դեմ: Հայաստանի համար խաղաղության պահպանումն առաջնային հարց է, սակայն միաժամանակ պետք է պատրաստ լինել վատագույն զարգացումների: Հնարավոր պատերազմի դեպքում Հայաստանը պետք է կանխի թշնամու հարձակումը, բայց միաժամանակ հարձակողական գործողությունների դիմի»,- ասաց Պապյանը:
Անդրադառնալով ՄՄ-ին Հայաստանի անդամակցության դեպքում ԼՂՀ կարգավիճակի հարցին՝ նա նկատեց, որ արցախյան արտադրության ցանկացած ապրանքի մակնշում այդ պարագայում կարող է իրական խնդիր դառնալ: «Եթե ապրանքների վրա գրվի «Արտադրված է ԼՂՀ-ում», կստացվի, որ արտասահմանյան շուկա է արտահանվում չճանաչված պետության արտադրանք, եթե Ադրբեջանում մենք դժգոհ կլինենք, երբ մակնշված լինի` «Արտադրված է Հայաստանում», կընդդիմանա Ադրբեջանը և այլն»,- ասաց Արա Պապյանը:
Խոսելով Հայաստանի հանդեպ ԵՄ-ի ներկա կեցվածքի մասին՝ «Մոդուս վիվենդի»-ի ղեկավարը նկատեց, որ Եվրոպան ակնհայտորեն նեղացած է Հայաստանից և իր տեղեկություններով՝ հակադարձող քայլեր է նախապատրաստում մեր երկրի դեմ:
«ԵՄ-ն Մաքսային միություն մտնելու համար չի ներելու Հայաստանին, որոշ պաշտոնյաների դեմ ձեռնարկելու է գործողություններ, այդ թվում՝ բանկային հաշիվների սառեցում և այլն»,- նշեց Արա Պապյանը՝ հավելելով, որ Ասոցացման համաձայնագրից հրաժարվելով՝ Հայաստանն իր տնտեսությունը ոտքի հանելու մեծագույն հնարավորություն բաց թողեց:
