Լիտվայի մայրաքաղաքում ԵՄ-ի «Արևելյան գործընկերության» ծրագրի մասնակիցների գագաթնաժողովից առաջ անվտանգության ուժեղացված միջոցառումներ են սահմանվում՝ ընդհուպ մինչև հետիոտնի համար քաղաքի որոշ հատվածների փակում: Այս մասին հայտնում է ITAR-TASS-ը՝ հղում կատարելով Վիլնյուսի ոստիկանապետ Վիտաուտաս Գրաշիսին:
Նա նշել է, որ բազմաթիվ օտարերկրյա պատվիրակությունների ժամանման առիթով երեք օրվա ընթացքում տրանսպորտի երթևեկությունը մայրաքաղաքում կսահմանափակվի: Ոստիկանապետը խորհուրդ է տվել մեքենա ունեցողներին օգտվել տրանսպորտից և հնարավորության դեպքում սահմանափակել այցելությունները քաղաքի այն շրջաններ, որտեղ անցկացվելու են պաշտոնական միջոցառումներ:
«Վիլնյուսի կենտրոնում որոշակի ժամերի կարող են մի քանի փողոցներ ու հրապարակներ փակ լինել նույնիսկ հետիոտնի համար, ինչպես նաև կարող է կազմակերպվել փաստաթղթերի ստուգում»,- ասել է ոստիկանապետը:
Նոյեմբերի 28-29-ը կայանալիք գագաթնաժողովին կմասնակցեն 34 երկրների ներկայացուցիչներ՝ պետության ղեկավարների, նախարարների և ԵՄ ղեկավարության մակարդակով:
