Անկախ Շոտլանդիայում որպես արժույթ առաջարկվում է թողնել բրիտանական ֆունտ սթեռլինգը, իսկ երկրի ղեկավար՝ Մեծ Բրիտանիայի թագուհուն: Այս մասին ասվում է փաստաթղթում, որը նկարագրում է նոր պետության կառուցվածքը: Փաստաթուղթը ներկայացված է Շոտլանդիայի կառավարության կայքում՝ փոխանցում է BBC-ն:
Նախագծի տեքստի համաձայն՝ Շոտլանդիան սեփական զինված ուժեր կունենա: Երկրի կառավարությունը հարկեր կհավաքի՝ Լոնդոնից անկախ, և, ինչպես սպասվում է, դրանք չեն բարձրացվի: Շոտլանդիայի տարածքից առաջարկվում է դուրս բերել բրիտանական միջուկային զենքը:
Փաստաթուղթը պատրաստած Շոտլանդիայի ազգային կուսակցության ներկայացուցիչները խոստանում են «հեղափոխություն» իրականացնել սոցիալական քաղաքականությունում: Նրանք առաջարկում են բարձրացնել նվազագույն աշխատավարձի չափը:
Փաստաթուղթը, որն ունի 670 էջ և կոչված է ապացուցելու ընտրողներին Շոտլանդիայի ինքնիշխանության ձեռքբերման անհրաժեշտությունը, հրապարակել է Շոտլանդիայի առաջին նախարար և Շոտլանդիայի ազգային կուսակցության առաջնորդ Ալեքս Սելմոնդը:
Շոտլանդիայի կարգավիճակի մասին հանրաքվեն նշանակված է 2014-ի սեպտեմբերի 18-ին:
Եթե շոտլանդացիները կողմ քվեարկեն Մեծ Բրիտանիայից Շոտլանդիայի առանձնացմանը (միավորել են 1707-ին), ապա պետությունն անկախություն կհռչակի 2016-ի մարտի 24-ին: Առաջին խորհրդարանական ընտրությունները կկայանան նույն տարվա մայիսին:
