Արդեն առիթ ունեցել ենք գրելու, որ նախագահ Սերժ Սարգսյանին օդ ու ջրի նման անհրաժեշտ է լինելու Գագիկ Ծառուկյանի և նրա գլխավորած «Ծառուկյան» դաշինքի աջակցությունը: Չնայած ֆորմալ առումով ՀՀԿ-ն ու նրա հնգամյակով բրոնյա արված կոալիցիոն գործընկեր ՀՅԴ-ն ունեն մեծամասնություն, ինչը բավարար է Սարգսյանին վարչապետի պաշտոնում ընտրվելու համար, սակայն «Ծառուկյան» դաշինքի աջակցությունը լրացուցիչ ամրություն է հաղորդելու Սարգսյանի իշխանությանը: Անակնկալների հնարավորությունը որևէ մեկը չի կարող բացառել, մանավանդ Հայաստանի նման երկրում, որտեղ խորհրդարանը մի քանի ժամում գունափոխվելու բացառիկ կարողություն է ցուցադրել:
Հանրապետական խմբակցությունը միայն առաջին հայացքից է կուռ և մի մարդու խոսքով շարժվող կառույց թվում: Մի թեթև տատանում, և այդ խմբակցությունը կարող է առնվազն 5-6 մասի բաժանվել: Դաշնակցականների մասին ընդհանրապես խոսք չկա, նրանք միշտ հաղթողների կողմն են: Ինչպես կասեր Օստապ Բենդերը՝ գաղափարական մարտիկներ՝ հանուն դրամանիշների։
Բայց Գագիկ Ծառուկյանի աջակցությունը Սերժ Սարգսյանին պետք է լինելու ոչ միայն խորհրդարանում վարչապետի ընտրության կազմակերպման ժամանակ: Հիմա Ծառուկյանի աջակցությունն ավելի շատ պետք է լինելու փողոցի հետ հարաբերությունները պարզելու համար: Խորհրդարանական և հիմնականում խորհրդարանից դուրս մնացած որոշ ուժեր փորձում են փողոցային պայքարի միջոցով կանխել Սերժ Սարգսյանի վարչապետ դառնալու ցանկությունը: Ծառուկյանը պետք է հնարավորն անի Սարգսյանին փողոց դուրս եկած ընդդիմությունից պաշտպանելու համար, քանի որ այդ հարցում նրանց շահերը համընկնում են: Փողոց դուրս եկած ընդդիմությունը, եթե անգամ պարտվի Սարգսյանի դեմ պայքարում, կարող է հաղթել ընդդիմության առաջնորդող ուժ ընկալվելու առումով:
Սերժ Սարգսյանի վարչապետությունը թույլ չտալու համար փողոցային պայքար սկսողները կարող են առնվազն երկու նպատակ հետապնդել. իսկապես թույլ չտալ, որ Սարգսյանը վարչապետ ընտրվի, և երկրորդ՝ հարամել նրա վարչապետությունը, նոր Մարտի 1 կամ նվազագույնը 2014թ. ապրիլի 12-ի իրադարձությունների կրկնություն հրահրելով:
Առաջին տարբերակը քիչ հավանական է թվում. ՀՀԿ-ն և ՀՅԴ-ն ընդամենը քվեարկության կոճակները սեղմելով, Սարգսյանին ընտրելու են վարչապետ, և այդ քվեարկության արդյունքներով նա դառնալու է վարչապետ: Միակ տարբերակը խորհրդարանում այդ քվեարկությունը թույլ չտալն է, կարճ ասած՝ հեղափոխությունը, ուկրաինական մայդանի սցենարի կրկնությունը, երբ իշխանությունը ժողովրդական զանգվածների ճնշման տակ փախուստի է դիմում: Այս տարբերակը քիչ հավանական է, պատմական փորձը հաշվի առնելով. հանրային անհամեմատ ավելի մեծ համախմբման դեպքերում ընդդիմությանը չի հաջողվել կոտրել իշխանության դիմադրությունը, և ընդհակառակը՝ իշխանությանն է հաջողվել կոտրել հանրության դիմադրությունը: Եթե տեղի ունենա երկրորդ տարբերակը, Հայաստանը կունենա հերթական անգամ արյան մեջ թաթախված իշխանություն, ավելի կոտրված ու հուսալքված հասարակություն:
Գագիկ Ծառուկյանը, անշուշտ, չի կարող հաշված չլինել իրադարձությունների զարգացման նման հնարավորությունը: Մի կողմից նրա համար իմաստ չունի աջակցել իշխանությանը, որը, կարծես թե, իր աջակցության կարիքը չունի: Բացի դրանից՝ աջակցելով իշխանությանը, Ծառուկյանն իր վրա է վերցնում այդ իշխանության նկատմամբ հանրային դժգոհության բեռի մի մասը: Նա դառնում է այդ իշխանության գոյության պատասխանատուն՝ դրանից բխող հետևանքներով: Բայց մյուս կողմից, իշխանությանը ցուցաբերած աջակցության դիմաց Ծառուկյանը ստանում է այդ իշխանության մեջ զգալի մասնաբաժին ունենալու հնարավորություն: Ընդ որում այդ մասնաբաժինը լինելու է ոչ թե նվերի տեսքով, այլ որպես արժանի հատուցում:
Ծառուկյանի բացահայտ աջակցությունը Սարգսյանին, ընդդիմությանը և փողոցային պայքարի կազմակերպիչներին զրկում է լեգիտիմությունից, որովհետև «Ծառուկյան» դաշինքն է ընդդիմության լեգիտիմ առաջնորդը: Խորհրդարանական ընտրություններից հետո բոլորի համար խիստ կասկածելի էր ՀՀԿ-ի ստացած արդյունքը, անգամ ընտրակաշառքի ազդեցությունը հաշվի առնելով, մինչդեռ բոլորի համար էլ պարզ էր, որ արդար ընտրությունների դեպքում «Ծառուկյան» դաշինքը 30 տոկոսից անհամեմատ ավելի տպավորիչ արդյունք էր արձանագրելու: Առայժ Ծառուկյանը և «Ծառուկյան» դաշինքը վարչապետական ապագա ընտրությունների նկատմամբ որդեգրել են չեզոք դիրքորոշում: Մի կողմից դաշինքը չի հայտարարում, որ առաջկցելու է իշխանության թեկնածուին, ասելով, որ վարչապետի ընտրությունը կոալիցիայի խնդիրն է, մյուս կողմից՝ դաշինքը չի ներքաշվում փողոցային պայքարի մեջ: Հնարավոր է, որ Ծառուկյանը սպասում է, թե երբ իշխանությունը և նախագահ Սարգսյանը կդիմեն իր աջակցությանը, որպեսզի նա կանգնի իշխանության կողքին: Ըստ ամենայնի՝ այդ առաջարկը շատ չի ուշանա:
