Թուրքիայի նախագահ Աբդուլլահ Գյուլը հայտարարել է, որ Անկարան հույս ունի բարելավել հարաբերությունները Եգիպտոսի հետ՝ հաղորդում է RIA Novosti-ն:
Շաբաթ օրը Եգիպտոսի իշխանությունները նվազեցրել են դիվանագիտական հարաբերությունները Թուրքիայի հետ և պահանջել են այս երկրի դեսպանից լքել Եգիպտոսը:
«Չեմ ցանկանում այդ մասին խոսել: Այնտեղ այժմ արտակարգ իրավիճակի ժամանակաշրջան է: Ցանկանում ենք, որպեսզի Եգիպտոսում շուտ տիրի ժողովրդավարություն: Եգիպտոսը և Թուրքիան երկու մեծ պետություններ են, որոնք սահմանակցում են Միջերկրական ծովին: Ամբողջ պատմության ընթացքում մեզ շատ բան է կապում, մենք լավ հարաբերություններ ենք ունեցել, լավ տնտեսական և գործնական կապեր: Հույս ունեմ, որ մեր հարաբերությունները կրկին կբարելավվեն»,- ասել է նա:
Թուրքիայի ԱԳՆ-ն մոտակա ժամանակներս հայտարարությամբ հանդես կգա և կհաղորդի քայլերի մասին, որոնք մտադիր է ձեռնարկել ի պատասխան Եգիպտոսի որոշման:
Հիշեցնենք, որ թուրք-եգիպտական հարաբերությունները վատացել են նախագահ Մուհամմադ Մուրսիի տապալումից հետո: Երկրները օգոստոսին հետ են կանչել իրենց դեսպաններին խորհրդակցությունների համար: Ավելի ուշ թուրք դեսպանը վերադարձել է Կահիրե: