Պարտադիր կուտակային կենսաթոշակային համակարգի մասին օրենքը լի է թերություններով և չի կարող արդարացնել իրեն: Այսօր տեղի ունեցած մամուլի ասուլիսի ժամանակ ասաց «Ընդդեմ կենսաթոշակային 5 տոկոս պարտադիր վճարի» Facebook-յան նախաձեռնության անդամ Հայկ Ավետիսյանը՝ հավելելով, որ եթե մարդը չի կարողանում հոգալ իր այսօրվա օրը, ինչպես կարող է կուտակել ծերության համար:
Նա նաև հիշեցրեց, որ օրենքի՝ ուժի մեջ մտնելուց հետո աշխատողները ստիպված են լինելու կենսաթոշակային ֆոնդին պարտադրողաբար թողնել իրենց վաստակի 6,6-13 տոկոսը:
Նախաձեռնության մեկ այլ անդամ` Տիգրան Մարտիրոսյանն իր հերթին նկատեց, որ պետությունն, այո, պետք է հոգա սեփական քաղաքացու սոցիալական ապահովության հարցը: «Սակայն ոչ ճոխ կամ բարեկեցիկ ծերության: Հենց այդպիսի ծերություն ապահովելու համար էլ պետությունը դիմում է այս նորամուծությանը: Բայց գուցե մարդն ուզում է մինիմալ, ապահով ծերություն վարել, և ոչ պետության ասածի նման բարեկեցիկ: Ընդ որում` կենսաթոշակային ֆոնդին թողնելիք 5 տոկոսը բավական մեծ գումար է: Արտասահմանում ամենաբարձր գանձումը 3 տոկոս է: Այնպես որ, այլ երկրների հետ համեմատության ընդհանուր եզրեր չկան»,- ասաց նա՝ հայտարարելով, որ իրենց նախաձեռնությունը դիմել է պատգամավորներին՝ օրենքը ՍԴ-ում վիճարկելու առաջարկով:
Ասուլիսի մյուս բանախոս Հարություն Աղամալյանն էլ նշեց, որ պարտադիր կուտակային կենսաթոշակային համակարգի մասին օրենքը վերաբերելու է 260 հազար մարդու: «Սակայն դրա՝ ուժի մեջ մտնելու դեպքում մարդկանց սոցիալական վիճակն էլ ավելի է վատթարանալու, նրանք չեն կարողանալու ազատ տնօրինել սեփական դրամական հոսքերը, հնարավորություն չեն ունենալու առձեռն ստանալ իրենց կուտակած գումարները և դրանք տնօրինել կարողանալու են միայն անբուժելի հիվանդությունների ծախսերը հոգալու համար: Սեփական աշխատավարձից կուտակած դրամը մարդը չի կարողանալու ծախսել մինչ կենսաթոշակային տարիքի հասնելը: Մեկ այլ խնդիր ևս՝ երկու արտասահմանյան հիմնադրամները, որ ոլորտը սպասարկելու պարտավորություն են ստանձնել, առ այսօր նույնիսկ լիցենզիա չեն ստացել»,- ասաց նա՝ հավելելով, որ պարտադիր կուտակային կենսաթոշակային համակարգի մասին օրենքը չի բխում ՀՀ տնտեսական շահերից և հակասում է երկրի Սահմանադրությանը:
Հիշեցնենք, որ համակարգը Հայաստանում կսկսի գործել 2014 թվականի հունվարի 1-ից:
